Baryńmen bólis, janyńmen túsin...

Oblys ortalyǵyndaǵy Máshhúr Júsip atyndaǵy meshitte «Baryńmen bólis!» qaıyrymdylyq sharasy ótýde. «Meshitte ár juma saıyn ótetin «Ba­ryńmen bólis!» qaıyrymdylyq sharasy kezinde múmkindigi shekteýli jandarmen birge, az qamtamasyz etilgen 25 otbasyna un, makaron, ósimdik maıy, qant, kúrish, qaraqumyq, halva, shaı, et jáne basqa da azyq-túlik salynǵan sómkeler berildi. Múgedektiń arbasy, jumsaq jıhazdar tabys etildi. Bas ımam Narıman Ermekulynyń aıtýynsha, «Baryńmen bólis!» qaıyrymdylyq sharasy eki aptada bir ret arnaıy tizim boıynsha muqtaj otbasylarǵa, kóp balaly analarǵa jınalǵan kıim-keshekter úlestiredi. О́tken jyly 13 otbasyna 275 myń 20 teńge qarjylaı, 610 otbasyna 440,325 teńge kóleminde materıaldyq jáne azyq-túlik kómegi jasalǵan. Bul shara jalǵasa berdi. Meıirim men ra­­qymshyldyqtan týyndaǵan qaıy­rymdylyq atty asyl qasıet ıesi bolýǵa umtylaıyq», dep jazady meshittiń baspasóz hatshysy Amantaı Toıshybaı elektrondy poshta arqyly joldaǵan aqparatynda. Birde qalalyq avtobýsta kele jattym. Kelesi bir aıaldamadan ishke engen eýropalyq óńdi apaı aınalasyna jaltaqtaı qaraıdy. Sóıtkenshe bolǵan joq, kondýktor áıel qasyna jetip keldi. – Qyzym, men umytyp ketippin... – deı bergeni sol edi, ananyń tarpa bas salǵany. – Al, sonda meni kim aıaıdy?! Umytyp ketippin... Men de júrmin tań atpastan osy avtobýsta! Aıaǵym talyp, sharshap! Eshteńe bilmeımin, kelesi aıaldamadan túsip qal! Bári osylaı syltaý aıtady! Avtobýs ishinde otyrǵan orys-qa­zaǵymyz aralas sol sátte aqyldasyp alǵandaı túgel ushyp túregeldik. Bárimiz álgi kempirge qaraı jaqyndadyq. Son­daǵysy, bar-joǵy 20 teńge jetpepti jolaqysyna! – Mine, alyńyz, alyńyz, – dep bá­rimiz jan-jaqtan álgi apamyzǵa 20 teń­geden, 100 teńgeden berip jatyrmyz. Kondýktor áıel bulaı bolar dep oılamasa kerek, qyp-qyzyl bolyp uıa­lyp turyp qaldy. Kóńili jaılanyp, balasha qýanyp, oryndyqqa jaıǵasqan álgi apamyzdyń sonda aıtqan «Áli de qaıyrymdy adamdar bar eken ǵoı...» degen sózi esimde qalypty. Al, meshit qyzmetkerleri «baryńmen bólis» deıdi. Qandaı jyly, júrek te­bi­renter sóz. Qazirgi kezde jolshybaı kólikke otyrý qaýipti. Saqtansań – saq­taıdy. Birde Moıyldy demalys úıine sheshemdi aparyp salyp, qa­laǵa qaıtýǵa shaǵyn avtobýs kútip tur­dym. Kún sal­qyn ári jańbyrly edi. Aıal­damaǵa ja­qyn jerde bir jas jigit kóli­gine otyryp, júrgeli tur eken. – Renjimeseń, qalaǵa deıin ala ketshi, aqysyn tóleımin ǵoı, – dedim qa­syna júgirip baryp. Úndegen joq, jáı ǵana basyn ızedi. Jol boıy bul jigit ún qatpaǵan soń men de úndegem joq. Bir kezde baryp, ashýlanyp burq-burq sóıledi. – Qashan osylar joldardy durystap jóndeıdi? Kólikten túk qaldyrmaıdy myna tastar! Sizge qatty yńǵaısyz bolsa kiná mende emes! Qalaǵa jaqyn kósheler mynadaı bolsa, aýyldarǵa ne sorym endi! Germanııanyń joldaryn kórseńiz ǵoı, qolyńyzdaǵy stakandaǵy sý tógilmeıdi! – Ol jaqqa baryp pa ediń? – dedim. – Iá, Kelnde joldasym turady. Bizdiń nemister ǵoı, qazaqsha aǵyp tur, – dedi. Sóıtkenshe, bolmaı, qalaǵa da kelip qaldyq. Áńgimemiz aıaqtalmaı, tanysyp ta úlgermedik. Rahmetimdi aıtyp, aqysyn usyna berip edim, «ápke, men jolshybaı júrgen adamnan eshqashan aqsha almaımyn. Saý bolyńyz», – dep júrdi de ketti... Sheshemiz alysta, Zaısanda turǵan soń jıi-jıi sálemdeme salyp, poshtamen jiberip otyramyn. Alǵan kúni-aq telefon arqyly habarlasady. – Kórshi qyz Qarlyǵash poshtadan alyp keldi. №36 degen sháıdi qaıdan aldyń ózi? Qaıtadan shyqqan ba? Ańsaǵan, Qanysha barlyq kórshiler jınalyp, sen jibergen sálemdemeni ashyp, táttilerden jep, buıyrǵanyn bólisip, máz-meıram, Nurgúl dastarqan jaıyp, sháı iship otyrmyz, – deıdi sheshem balasha qýanyp. Adamdardy balasha qýantsań, baryńmen bólisseń, budan artyq ne bar?.. Farıda BYQAI, «Egemen Qazaqstan». PAVLODAR.