Sezge qatysýshylar sany – 2 myń adam

«Nur Otan» partııasynyń Baspasóz ortalyǵynda partııa hatshylary Farhad Qýanǵanov pen Qanybek Jumashevtiń qatysýymen brıfıng ótti. Brıfıng barysynda Elbasynyń Jar­lyǵyna sáıkes, Qazaqstan Res­pýb­lıkasy Parlamenti Májilisi depýtattarynyń kezekten tys saılaýy ótetindigine baılanysty búgingi kúnge deıin elimizdiń barlyq óńirinde partııa fılıaldary saıa­sı keńesteriniń keńeıtilgen otyrystary ótkendigi, ol jerlerde partııanyń saılaýaldy baǵdarlamasynyń jobasy aldyn ala talqylanyp, sezd delegattarynyń quramy bekitilgendigi belgili boldy. Partııa hatshylarynyń aıtýlaryna qaraǵanda, eger partııa músheleriniń sany búginde 970 myńǵa jýyqtasa, sezge qatysýǵa solardyń ishinen 600-den astam delegat saılanypty. Al jalpy, partııanyń kezekten tys XVII sezine 2 myńnan astam adam qatysady dep kútilip otyr eken. Q.Jumashev «Nur Otan» partııasy elimizdegi eń iri saıası kúsh retinde bul saılaýǵa mindetti túrde qatysýdy kóz­dep otyrǵanyna toqtaldy. «Osy sezd, árıne, óziniń tarıhı mańyz­dylyǵymen erekshelenedi. О́tken kezeń­derdi saralaıtyn bolsaq, partııa óziniń alǵa qoıǵan mindetterin oryndap, kóptegen máseleni merziminen buryn sheship, endi aldaǵy 5 jyldyqqa jańa maqsattar men mindetter qoıýdy kózdep otyr. Búgin, osy sezdiń qarsa­ń­ynda partııa Tóraǵasynyń birinshi orynbasary Asqar Myrzahmetovtiń tóraǵalyǵymen «Nur Otannyń» Saıası keńesiniń keńeıtilgen otyrysy ótedi. Oǵan aımaqtyq delegasııalardyń ókilderi, partııanyń aımaqtyq jáne aýmaqtyq fılıaldary tóraǵalarynyń birinshi orynbasarlary, Ortalyq apparat basshylary qatysady. Bul degenimiz – Saıası keńes ókilderiniń par­tııa­myzdyń barlyq fılıalyn qamtı­tyndyǵy. Olardyń jalpy sany – 100 adam. Biz olardyń basyn qos­qan kezde, sezdiń negizgi jumys­shy organdarymen Saılaýaldy baǵdar­lamany bekitip, ony sezdiń qaraýyna usyna­tyn bolamyz», – dedi Q.Jumashev. Sonymen qatar, ol mundaı aý­qym­dy saıası naýqanǵa daıyndyq jumystary jer-jerde júrgizilip jatqanyn aıta kele, sezd ótkizý týraly sheshim qabyl­danǵannan keıin elimizdiń óńirlerinde ótken saıası keńesterdiń keńeıtilgen otyrystaryna partııanyń belsendi músheleri, partııa janyndaǵy qoǵamdyq uıym­dardyń, partııalyq baqylaý komıs­sııasynyń «Jas Otan» jastar qanatynyń ókil­deri qatysyp, onda Saılaýaldy tuǵyr­nama jan-jaqty talqylanǵanyn jetkizdi. Al F.Qýanǵanov ta Saılaýaldy baǵ­dar­lamanyń Saıası keńestiń keńeı­tilgen otyrysynda talqylanyp, kóp­shilik nazaryna usynylatynyn, onyń ózeginde Elbasynyń 5 ınstıtýttyq reformasyn júzege asyrýǵa baǵyttalǵan «100 naqty qadam» men Ult Jospary, «Qazaqstan-2050» Strategııasy, «Nur­ly Jol» baǵdar­lamasynyń negiz­gi qa­ǵı­­dalary men basymdyqtary jatqa­nyn tilge tıek etti. Brıfıng bary­syn­da, son­­daı-aq, «Nur Otan» par­tııa­sy­nyń Jar­ǵysyna sáıkes, Saıası keńes­­tiń quzy­retine partııanyń saılaý naýqan­daryna qatysýy jáne partııa seziniń kún tártibin qalyp­tastyrýǵa baılanysty máselelerdi qaraý jatatyny aıtyldy. Soǵan baılanysty partııanyń Saıa­sı keńesiniń keńeıtilgen otyrysyn­da Saılaýaldy baǵdarlamanyń jobasy­nan bólek, Parlament Májilisi depýtat­taryn saılaý jónindegi partııa­lyq tizim, partııanyń kezekten tys XVII seziniń mandattyq, eseptik, re­dak­sııalyq keńester jáne hatshylyq syn­dy jumysshy organdary tóńiregin­degi máseleler qozǵalmaq eken. Sony­men qatar, partııa hatshylary óz sóz­derinde partııalyq tizimniń quramyna Qazaqstannyń áleýmettik-ekonomıka­lyq, mádenı-rýhanı damýyna úles qosyp júrgen azamattardan bólek, bola­sha­ǵynan úlken úmit kúttiretin bilikti de bilimdi, kreatıvti jastardyń da kiretinine senim bildirdi. Láıla EDILQYZY, «Egemen Qazaqstan».