Áskerı BAQ: yntymaqtastyq artady

Qazaqstan Respýblıkasynyń Qorǵanys mınıstrligi áskerı is-sharalardan aqpar beretin jýrnalısterdi daıarlaý boıynsha L.N.Gýmılev atyndaǵy Eýrazııa ulttyq ýnı­versıtetimen yntymaqtastyq týraly memorandýmǵa qol qoıdy. «Áskerı jýrnalısterdi daıarlaý» – ýaqyt talaby. Jýrnalısterge beıbit jaǵdaıda ǵana emes, ekstremaldy, jaýyn­gerlik jaǵdaıda da jumys jasaı bilýdi úıretý qajet», – dep atap ótti Qorǵanys mı­nıstriniń orynbasary, general-maıor Talǵat Muhtarov. Memorandýmnyń negizgi baǵyty – eńbek naryǵynda suranysqa ıe áskerı jýrnalısterdi daıarlaý jónindegi birlesken bilim berý baǵdarlamalaryn iske asyrý bolyp tabylady. Sonymen qatar, Memorandým qorǵanys vedomstvosy jáne joǵary oqý orny ókilderiniń bi­lim berý deńgeıi men ǵylymı biliktiligin arttyrýda ózara kómek kórsetýge yqpal etedi. Memorandýmǵa qol qoıý sheńberinde alǵashqy is-shara josparlanyp otyrǵanyn da aıta ketken jón. Buqaralyq aqparat quraldarynyń bolashaǵy úshin mańyzdy bolǵan basqosý barysynda sóz alǵan, atalmysh oqý ornynda ashylǵan Jýrnalıstıka máselelerin zertteý ınstıtýtynyń dırektory Namaza­ly Omashev: – Eýrazııa ýnıversıteti men Qorǵanys mınıstrligi qolǵa alyp otyrǵan bul keli­sim tilshilik tirshiliktiń tizginin us­taýǵa nıetti jastardyń keleshegi úshin kerek dúnıe. Jýrnalıst, eń birinshi, patrıot bolýy qajet. Ishki rýhy myqty adam ǵana oqys oqıǵa ornynan aqparat taratýdan taıyn­baıdy, – dedi. L.N.Gýmılev atyndaǵy Eýrazııa ulttyq ýnıversıtetiniń jýrnalıs­tıka jáne saıasattaný fakýltetiniń stýdentteri alǵash ret Qorǵanys mı­nıstrliginiń ekstremaldy jýrnalıstı­ka boıynsha «Áskerı dıskýrs» praktıkalyq semınaryna qatysady. Úsh kún ishin­de áskerı qyzmetshi nusqaýshylar teorııa­lyq jáne praktıkalyq sabaqtarda bolashaq jýrnalısterge qarýly qaqtyǵys aımaqtarynda jumys jasaý negizderi men áskerı is-qımyldardy jarııa etýdi úıretedi. Raýan QAIDAR, «Egemen Qazaqstan».