Jambyl oblysynda 62,3 myń gektar jer paıdalanýsyz jatyr

TARAZ. 29 qańtar. Jambyl oblysy -- jer resýrstarynan kende emes. Oblys respýblıka aýmaǵynyń 5,3 paıyzyn nemese 14 mıllıon 426 myń gektardan astam aýmaqty alyp jatyr. Bul týraly egemen.kz tilshisi habarlady. Bul halyq sanyna shaqqanda oblystyń árbir turǵynyna 13,5 gektardan aınalady. О́ńir aýmaǵynyń 72 paıyzy taýarly aýyl sharýashylyǵy óndirisin júrgizýge qolaıly jerler bolyp tabylady. Jambyl oblystyq jer qatynastary basqarmasynyń basshysy Ilııas Tortaevtyń aıtýyna qaraǵanda, 2014 jylmen salystyrǵanda ótken jyly egistik jerlerdiń ıgerilý kólemi 7 myń gektarǵa ulǵaıǵan. Alaıda, oblys aýdandarynda 62,3 myń gektar egistik jer paıdalanýsyz qalǵan. Monıtorıng qorytyndysy egistik jerlerdi paıdalaný kórsetkishi Moıynqum, Sarysý, Talas aýdandarynda 71-84 paıyzdan aspaı otyrǵandyǵyn kórsetken. Egin sharýashylyǵy jaqsy damyǵan aýdandar ishinde jerdiń eń tómengi ıgerilý kórsetkishi Shý aýdanynda qalyptasyp otyr. Atalmysh aýdanda ótken jyly 32 myń gektardan astam egistik jer paıdalanýsyz qalǵan. Basqarma basshysy bul kórsetkishter jerdi paıdalaný men qorǵaýdy baqylaý deńgeıiniń talaptaryna saı emestigin aldyǵa tartady. Jer qoryn túgendeý jumystary da úzdiksiz júrgizilip keledi. Búgingi tańǵa anyqtalǵan jerdiń 547 myń gektary ıaǵnı 93 paıyzy qaıtarylǵan. Desek te, aldyńǵy jyly júrgizilgen túgendeý barysynda málim bolǵan 43 myń gektar aýyl sharýashylyǵy jeri memleket ıeligine qaıtarylmaı otyr. Atap aıtar bolsaq, Qordaı aýdanynda – 3, Shý aýdanynda 40 myń gektar jer memleket ıeligine ótýi kerek. Oralhan Dáýit. Derek, sýret: egemen.kz