Qazaqstanda jumyssyzdyq bolmaýy kerek

«Nur Otan» partııasynyń XVII sezinde sóılegen Elbasynyń sózin teledıdardan kórip, den qoıyp tyńdadyq. Ult Josparyn iske asyrý úshin memlekettik qyzmetkerlerdiń bilik, bilimi myqty, básekege qabiletti, ekonomıkalyq saýatty bolýy talap etilýi zańdy. Áıtpese, kóke, jákesiniń arqasynda jaqsy mansap alyp, shóp basyn syndyrmaı júrgender de jeterlik. Oblys basshylarynyń jeke handyq qurǵandaı jan-jaǵymen sanaspaıtyndyǵy da jaqsy aıtyldy. Máselen, Ońtústik Qazaqstan oblysynda respýblıka boıynsha jylyjaılardyń 87 paıyzy ornalasqan. О́nimi Reseıge deıin ketip jatady. Nege ózge oblystar kelisimshart túzbeıdi?! Birinde bar, birinde joqqa taldaý jasap, birlese is-qımyl jasasa, kórshi memleketterden aǵylyp jatqan azyq-túlikterge ketetin qarjy óz elimizde qalyp, óz ekonomıkamyzǵa jumys isteýmen qatar qymbatshylyqtyń aldyn alar edik. Qazir barlyq deńgeıdegi ákimderden eń aldymen bıýdjet aqshasyn qaıda jumsaımyn emes, bardy baǵalaı alatyn menedjerlik qabilet kútiledi. Ult Jospary bar, «100 naqty qadam» belgilengen, tek iskerlikpen iske asyr. Nursultan Ábishulynyń «Qazaqstanda jumyssyzdyq bolmaýy kerek» degeni de kóńilge qondy. Elimizde shaǵyn jáne orta kásipke óte ońdy jaǵdaı jasalǵan. Eńbekqor adamdar búginde kásibin dóńgeletip, úlken paıdaǵa kenelip jatyr. Jaqynda oblystyq kásipkerlik, ındýstrııalyq-ınnovasııalyq damý jáne týrızm basqarmasynyń basshysy Maqsat Qarǵabaev sharýalar úshin jaǵymdy jańalyq aıtty. Buryn sharýalar jeke kásibine nesıe alǵanda 14 paıyzdyń 7 paıyzyn memleket moınyna alyp kelgen. Endi aýyldyq jerlerde jeke sharýashylyq ashqan fermerler 4 paıyzben nesıe alady eken. Bul degen naǵyz kerekti memlekettik qoldaý ǵoı. Oblys ákimdigi men «Damý» qory sharýalar men dıqandarǵa taǵy da jeńildik jasaý úshin joba túzýde. Osynyń bári shyn jumys jasaǵysy kelgen adamǵa jumysym joq degizbeıdi. Bul baǵytta «Nur Otan» partııasyna úlken jaýapkershilik júktelip otyr. Elbasy belgilep bergen Ult Josparyn oryndaı alsaq, bul qazaqtyń kósegesi búgingisinen de kógeredi. Ońǵar TÁJIEV, «Qazaqstan joly» gazetiniń bas redaktory. Ońtústik Qazaqstan oblysy.