Jaýapkershilik jeńildemeıdi

Biz sezd ótisimen «Nur Otan» partııasy oblystyq fılıaly tóraǵasynyń birinshi orynbasary Artýr MOLDAǴULOVPEN telefon arqyly habarlasyp, Elbasynyń sózinen týyndaıtyn jańa talaptar jóninde oı bólisken edik. – Artýr Kenjeákimuly, aldymen saıası forýmnan alǵan áserlerińizben bólisseńiz? – Astanadaǵy Táýelsizdik saraıynda ótken «Nur Otan» partııasynyń kezekten tys HVII sezine oblystan 32 delegat qatysyp, saıası uıymnyń Tóraǵasy Nursultan Nazarbaevtyń baıandamasyn zor yqylaspen tyńdady. Elbasy partııa aldyna jańa mindetter júktep, bes ınstıtýttyq reformada mejelengen talaptardy tıimdi oryndaý talabyn qoıdy. «Biz asa kúrdeli ekonomıkalyq damý kezeńinde reformalardy qolǵa alyp otyrmyz. Bul solaı bolýy da kerek. Daǵdarystyń ózi jańa deńgeıge kóterilýge septigin tıgizedi. Sondyqtan da, «Nur Otan» partııasynyń, onyń árbir múshesiniń mindeti – osy. Ult Jospary – bizdiń aldaǵy bes jyldyǵymyzdy qamtıtyn saılaýaldy baǵdarlamamyzdyń ózegi» degeni ár delegattyń kókeıine qondy. – Sezdiń tarıhı mańyzy nede dep oılaısyz? – Partııanyń kezekten tys sezinde saıa­sı uıymnyń «Qazaqstan-2021. Birlik. Turaqtylyq. Jasampazdyq» atty jańa saılaýaldy tuǵyrnamasy bekitildi. Elbasy óz sózinde «100 naqty qadam» Ult Josparyn júzege asyrýdyń naqty qadamdaryna toqtala kelip, barlyq deńgeıdegi ákimder men partııalyq uıymdardy osyǵan jumylýdy mindettedi. Asa kúrdeli ekonomıkalyq damý kezeńinde Ult Jospary «Nur Otan» partııasynyń saılaýaldy baǵdarlamasynyń ózegi bolyp tabylady. Ol aldaǵy besjyldyq kezeń boıynsha 2021 jylǵa deıingi partııanyń negizgi baǵyttaryn qamtıdy. Sóıtip, bes ınstıtýttyq reforma, «Qazaqstan-2050» Strategııasy, «Nurly Jol» baǵdarlamalaryn júzege asyrý qamtamasyz etiledi. Aldaǵy Parlament Májilisi saılaýyna «Nur Otan» partııasynyń qatysýy eskerilip, soǵan oraı partııalyq tizim bekitildi. Jańa turpatty Parlament quramyna óńirge tanymal azamattar, bolashaǵynan úlken úmit kúttiretin jastar, basqa da mamandyq ıeleri saılanady dep bilemin. – Memleket Basshysy óz sózinde «Nur Otannyń» 17 jyldyq kóshbasshylyǵy ekonomıkamyzdyń, memleket pen qoǵamnyń naqty jetistikterine aınalǵanyn aıtty. Bul jaıynda ne deısiz? – Partııa óziniń alǵa qoıǵan mindetterin árkez oryndap, shyn mánindegi halyqtyq qurylymǵa aınaldy desek, ony eshkim joqqa shyǵara qoımas. Qandaı qıyn jaǵdaıda da ýádesine berik ekenin kórsetip keledi. Eksporttyq ónimder baǵasynyń quldyraýyna, bıýdjet kirisiniń 40 paıyz kemýine qaramastan el turǵyndaryn áleýmettik qoldaý jalǵasyp otyr. «Nurly Jol» baǵdarlamasy qolǵa alynǵan birinshi jyly 775 mıllıard teńge qarastyrylsa, aldaǵy ýaqyttarda 400 myń jańa jumys oryndaryn ashý kózdelgen. 500 shaqyrym jol, 7 myń turǵyn úı, 500 densaýlyq saqtaý nysandary salynǵan. Sonymen qatar, ár dáýirdiń óz belgisi bar ekeni, soǵan oraı alda kóp syn-qaterler kútip turǵanyn da jasyrmady. Munaıdyń tómen baǵasy jaǵdaıynda ómir súrip kele jatqanymyzǵa qaramastan, halyqtyń ómir súrý sapasy tómendemegenin, endi jańa ahýalda ómir súrýge, syn-qaterlerdi eptilikpen eńserýdi úırenýge shaqyrdy. – Sezden túıgen oıyńyz, alǵan taǵylymyńyz az emes eken. Jergilikti jerlerde qandaı máselelerge basym baǵyt bermeksizder? – Prezıdent Ult Josparynyń mańyzdylyǵyn halyqqa barlyq deńgeıde túsindirý mindetin júktedi. Álemdi ekonomıkalyq turaqsyzdyq dendegen kezde áleýmettik máseleler sheshýshi býyn bolyp qala beredi. «Qazaqstan. 2017 maqsattary. Ulttyq is-qımyl jospary» saılaýaldy tuǵyrnamasyn júzege asyrýda belsendilik tanytqan fılıaldyń 39 myńnan astam múshesi partııanyń saılaýaldy Tuǵyrnamasyn nasıhattaý jumystarynyń bel ortasynan tabylary sózsiz. Bilim berý, densaýlyq saqtaý, shaǵyn jáne orta kásipkerlikti damytý, azamattardy áleýmettik qoldaý, aýyl sharýashylyǵy salalary boıynsha da partııalyq jobalardy júzege asyrýdyń tıimdi tetikterin qarastyratyn bolamyz. Qoǵamnyń álsiz toptary – múmkindigi shekteýli jandar men qarttardy erekshe qamqorlyqqa alyp, «Kedergisiz keleshek» «Ardagerlerdi ardaqtaıyq!» aksııalary jalǵastyrylady. Fılıal janynda óńirimizdegi nysandardy beıimdeý barysyn qadaǵalaıtyn qoǵamdyq keńes, múmkindigi shekteýli jandarǵa arnalǵan nysandarǵa monıtorıng júrgizý jónindegi jumys toby jumys isteıdi. Qoǵamdyq qabyldaýǵa túsken 21 ótinish túgeldeı óz sheshimin tapty. Uly Otan soǵysynyń ardagerleri men zeınetkerler bizdiń nazarymyzdan tys qalǵan emes. Partııanyń «Ardagerlerdi ardaqtaıyq!» jobasy aıasynda 259 ardagerge kómek kórsetildi. Otynmen, dárimen, turmystyq qondyrǵylarmen, medısınalyq qurylǵylarmen qamtamasyz etildi. «Baqytty balalyq shaq» jobasy aıasynda da aýqymdy sharalar atqaryldy. «Jemqorlyqsyz el», «Bizdiń aýyl», «Jastar – kadr rezervi», «Sátti qadam», «Jastar – Otanǵa!» syndy jobalarǵa partııa músheleri qosqan úles az emes. Oblystyq partııalyq uıym jumysynyń mańyzdy bóligi – qoǵamdyq qabyldaý. Partııanyń óńirlik jáne aýmaqtyq fılıaldaryna kez kelgen adam kelip, tolǵandyrǵan máselesin aıta alady. Partııanyń qoǵamdyq qabyldaýyna azamattardan 2087 ótinish tústi. Soǵan qaraǵanda sýmen, jaryqpen qamtý, abattandyrý, kógaldandyrý, tarıfter baǵasynyń kóterilýi jáne qyzmet kórsetý, kommýnaldyq qyzmettiń jumys sapasy jónindegi máseleler áli de mańyzdy ekenin kórsetedi. Aldymyzda aýqymdy mindetter tur. – Áńgimeńizge rahmet! Áńgimelesken О́mir ESQALI, «Egemen Qazaqstan». Soltústik Qazaqstan oblysy.