AQSh ofıseri jezóksheler qyzmeti úshin qupııa málimetterdi saýdalaǵan

ASTANA. 31 qańtar. AQSh áskerı-teńiz flotynyń ofıseri syılyq pen jeńil júristi qyzdardyń qyzmeti úshin qupııa málimetterdi saýdalap kelgen. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. AQSh ádilet mınıstrliginiń habarlaýynsha, kommander áskerı dárejesindegi teńiz flotynyń jaýyngeri Pentagonnyń jaldamaly qyzmetkerine qupııa aqparattardy aqsha, syılyqtar men jeńil júristi qyzdardyń qyzmetine aıyrbastap otyrǵan. Maıkl Vannak Hem Mızevıch esimdi ofıser óziniń paraqorlyqqa baılanysty eki qylmystyq is boıynsha kináli ekenin moıyndaǵan. «Kommander Maıkl Vannak Hem Mızevıch sheteldik jaldamaly qyzmetkerge qupııa aqparattar berip otyrǵan. Eger bul málimetter ózge bireýdiń qolyna tússe, ulttyq qaýipsizdiktiń tas-talqanyn shyǵarar edi», – dep habarlady AQSh bas prokýrorynyń orynbasary Leslı Kaldýell. Bas prokýratýra ókiliniń sózine qaraǵanda, osy is-áreketi arqyly kúdikti amerıkalyq áskerılerdiń basyn úlken qaýip-qaterge tikken. Al kúdikti jaýynger kinásin moıyndaǵan. Ol 2011-den 2013 jylǵa deıin GDMA dep atalatyn sıngapýrlik kompanııaǵa qupııa aqparattardy usynyp, kelisimshart jasasý kezinde osy kompanııanyń múddesin qorǵap kelgen. Aqparatpen almasqany úshin kompanııa bastyǵy Leonard Glenn Frensıs ofıser men onyń otbasyna saltanatty qonaq úılerde damalys, sondaı-aq, Maıkl Vannak Hem Mızevıchke jezókshelerdiń qyzmetin syıǵa tartyp otyrǵan. Bul is boıynsha Mızevıchtiń toǵyz sybaılasy da jaýapqa tartylýda. Olardyń qatarynda AQSh áskerı teńiz flotynyń tórt ofıseri, onyń ishinde, flottyń krımınaldyq tergeý qyzmeti – AQSh teńiz polısııasynyń qyzmetkerleri de bar. Toǵyz kúdiktiniń segizi óz kinálaryn tolyq moıyndaǵan bolsa, bireýi 27 aıǵa túrmege jabyldy. Elaman Qońyr. Derek, sýret: RIA «Novostı».