Nıgerııadaǵy jarylystan qaza tapqandar sany 86 adamǵa jetti

ASTANA. 1 aqpan. Nıgerııanyń soltústik bóligindegi Maıdýgýrı qalasyna taıaý mańdaǵy eldi mekende bolǵan jarylystan qaza tapqandar sany 86 adamǵa jetti. Sondaı-aq, 62 turǵyn túrli jaraqat aldy. Bul týraly interfax.ru saıtyna silteme jasaǵan egemen.kz tilshisi habarlady. Lańkestik áreketke barǵan taǵy da «Boko haram» uıymynyń lańkesteri ekeni anyqtaldy. Olar aımaq turǵyndarymen qatar jaqyn mańaıdaǵy bosqyndar lagerine de shabýyl jasaǵan. Kýágerlerdiń aıtýynsha, sodyrlar toby Dalorı eldi mekenine arnaıy áskerı kıim kıgen kúıde birneshe motosıklmen, júk kólikterimen kelgen. Kelgen betterinde jarylǵysh zattardy lashyq úılerge laqtyryp, artynsha beı-bereket oq jaýdyrǵan. Qashyp qutylmaq bolǵandardyń arasynda jankeshtiler paıda bola ketip, ózderin jaryp jiberdi. Mańaıda saý baspana qalmaǵan. Tártip saqshylary oqıǵa ornyna kelgenimen lańkesterge toıtarys bere almaı, qosymsha jasaq tobyn kútti. Osydan soń ǵana lańkester uıymy sheginis jasaǵan. Aıta keteıik, atalǵan uıymnyń shabýylynan sońǵy 6 jyl ishinde 20 myńnan astam beıbit turǵyn qaza taýyp, ondaǵan myńy túrli jaraqat alǵan. Osyǵan baılanysty 2,5 mıllıon adam baspanalaryn tastap ketýge májbúr boldy. Atalǵan top kóbine Nıgerııanyń soltústik-batysynda, sondaı-aq, Kamerýn men Chad elderine terrorlyq shabýyl jasaıdy. Aıan Ábdýálı. Derek: interfax.ru. Sýret: 112.ua.