Myzǵymas birlik, tynymsyz eńbek

Keshe Astanada «Aýyl» halyqtyq-demokratııalyq patrıottyq partııasynyń kezekten tys HII sezi ótti. Jıynda elimizdiń barlyq óńirlerinen kelgen delegattar Elbasy Nursultan Nazarbaevtyń Jarlyǵyna sáıkes, kezekten tys Parlament Májilisiniń saılaýyna qatysý týraly partııa sheshimin maquldady. Sondaı-aq, sezde Parlament Májilisine úmitkerlerdiń partııalyq tizimi bekitildi ári uıymnyń saılaýaldy baǵdarlamasy qabyldandy. Sezde birinshi kezekte sóz alǵan Aýyl» halyqtyq-demokratııalyq pat­rıottyq partııasynyń tóraǵasy Álı Bektaev uıymnyń qazirgi tańdaǵy baǵyty men atqaryp otyrǵan qyzmeti jóninde toqtala kelip, aldaǵy saılaý naýqanynyń mańyzdylyǵyna ekpin berdi. Búgingi basqosýdyń orny aıryqsha! «Aýyl» halyqtyq-demokratııalyq pat­rıottyq partııasy qoǵamymyzdyń ór­kendeýine óziniń úlesin qosa júrip, kemeldengen saıası uıymǵa aınaldy. El Prezıdenti Nursultan Nazarbaev halyqqa «Máńgilik El» ulttyq ıdeıasyn jarııa etti. «Aýyl» partııasynyń da basty maqsaty – Qazaqstannyń táýelsizdigin bekemdeı túsip, «Máńgilik Eldi» nyǵaıtyp, bekitý! Qazirgi zamannyń jahandyq syn-qaterleri halqymyzdyń rýhanı-adam­ger­shilik qundylyqtaryn saqtap qalý úshin ýaqtyly ári naqty áreket etýimizdi talap etedi. Bizdiń partııa osy máselemen keshendi túrde shuǵyldanatyn bolady, dedi Á.Bektaev. Odan ári spıker elimizdiń aýyl sha­rýashylyǵy salasynyń mol múmkindikteri jóninde keńinen áńgimelep ótti. Biz aýyl halqynyń ózekti máselelerin basty nazarda ustaýymyz kerek. О́zderińiz bilesizder, aýyl jáne agroónerkásip kesheni elimizdiń damýy jolynda erekshe oryn alady. Elimizdiń 8,0 mıllıon turǵyny, ıaǵnı halqymyzdyń 45 paıyzy aýyldarda turady. Agrarlyq óndiris Qazaqstan halyq sharýashylyǵynyń iri jáne dástúrli salasy bolyp tabylady. Sońǵy jyldary aýyl men aýyl­sha­rýashylyq salasyn qoldaýǵa memleket tarapynan naqty qadamdar jasaldy. De­genmen, atalǵan salada sheshimin kútken túıtkilder barshylyq. Máselen, otandyq taýar óndirýshiler ónimderiniń basym bóligi jeke qosalqy sharýashylyqtardyń úlesinde. Alaıda, olarǵa ortalyq jáne jergilikti atqarýshy oryndar tarapynan jetkilikti deńgeıde kóńil bólinbeýde. Statıstıkalyq málimetterge qara­ǵanda, elimiz boıynsha mal sharýashylyǵy salasyna tıesili jalpy óniminiń 72 paıyzyn jeke qosalqy sharýashylyqtar óndiredi. Búginde aýyl turǵyndarynyń jeke qoralarynda iri qara maldyń 65 paıyzy, qoı men eshkiniń 61 paıyzy, jyl­qynyń 54 paıyzy shoǵyrlanǵan. Biz osynaý múmkindikti jalpy el ıgiligi úshin utymdy paıdalanýymyz kerek, dedi partııa tóraǵasy. Sonymen qatar, Á.Bektaev sez­ge qatysýshy delegattardyń nazaryn aýyl­sha­rýashylyq jerlerin maqsatty jáne ońtaıly paıdalanýǵa baqylaýdy kúsheıtý qajettigine aýdardy. «Aýyl» partııasy aýylsharýashylyq jerlerine qatysty máselelerge kóz jumyp qaramaıdy. 180 mıllıon gektar aýylsharýashylyq jer­leriniń 30 paıyzy túrli erozııaǵa ushy­raǵan. Bul alqaptardyń jaǵdaıy bizdi oılan­dyrýy tıis. Aýylsharýashylyq jer­lerine qazirgi zamanaýı tehnologııalar­dy qoldanýdyń jetkiliksizdigi de úlken másele. Sondaı-aq, astyq egiletin jerler­diń 40 paıyzyna arnaıy daıyndalǵan sapaly tuqym sebil­meıdi, dedi ol. Sondaı-aq, partııa tóraǵasy agrarlyq ǵylym salasynyń múm­kin­dikterin óz sóziniń arqaýy etti. «Aýyl sharýashylyǵy salasyna qatysty 200-ge jýyq ǵylym doktory men 500-den astam ǵylym kandıdatynyń áleýetin tolyq paıdalana almaı otyrmyz. Qazaqstanda ǵylymı ınstıtýttardyń sany bilim berý ortalyqtarynan kóp. Alaıda, ınnovasııalyq júıeni jetildirý óz deńgeıinde emes. Osy oraıda barlyq aýdan ortalyqtarynan mamandardyń bilimi men mashyǵyn jetildiretin oryndar ashý qajet. Biz ǵylym men aýyl sharýashylyǵyn tyǵyz baılanystyra otyryp jumys isteýimiz kerek, dedi spıker. Sonymen qatar, partııa tóraǵasy memleket tarapynan aýyl sharýashylyǵy salasyna jasalyp jatqan qoldaýlar jóninde aıta kelip, aýyldy keshendi damytýǵa baǵyttalǵan – aýyldaǵy áleýmettik jáne ınjenerlik ınfraqurylymdy damytýǵa qabiletti «Aýyl ınfraqurylymy» atty memlekettik baǵdarlamany daıyndaý qajettigin jetkizdi jáne basqa da ózekti máse­lelerdi atap kórsetti. Jıyn barysynda partııa tóraǵasy Álı Bektaev birqatar áleýmettik máselelerdi de sóz etti. Ol sóziniń sońyn: «Aldymyzda bıik belester bar. Olardan alqynbaı asý – óz qolymyzda. Myzǵymas birlik pen tynymsyz eńbek, jasampazdyq pen jańashyldyq, rýhanı bıiktik – bizdiń eń basty quralymyz. Partııamyz pármendi, eldigimiz máńgilik bolsyn!» – dep túıindedi. Budan keıin birqatar azamat minbege kóterilip, partııanyń aldy­na qoıyp otyrǵan maqsat-mindeti, baǵy­ty turǵysynda sóz qozǵaı kelip, óz áriptesterin aldaǵy saılaýǵa belsendi qatysýǵa shaqyrdy. Sonymen, sezd sońynda qaty­sý­shylary «Aýyl» HDPP-nyń «Aýyl dástúrin jańǵyrtamyz» atty saılaýaldy baǵdarlamasyn biraýyzdan qabyldady jáne zańnama talaptaryna saı 19 adamnan turatyn úmitkerlerdiń partııalyq tizimin bekitti. Joldybaı BAZAR, «Egemen Qazaqstan». Sýretti túsirgen Erlan OMAROV.