Kúı bolyp tógilgen mura

Ǵazıza Jubanova atyndaǵy oblystyq fılarmonııada ótken «Aqtóbe óńiriniń mýzykalyq murasy» atty aýdıojınaqtyń tusaýkeserine ónersúıer qaýym kóp jınaldy. Aýdıojınaqtyń alǵysózin oblys ákimi Berdibek Saparbaev jazǵan. Jınaqqa Aqtóbe jerinde týǵan, ómir súrgen belgili aqyndar men halyq kompozıtorlarynyń shyǵarmalary engen. Qazaq handyǵynyń 550 jyldyǵyna oraı shyǵarylǵan án men kúı jınaǵynda 12 SD dısk bar. Olarǵa 213 shyǵarma jınaqtalypty. Aqtóbe óńiri mýzykalyq muraǵa baı. Jınaqqa Aqtóbe topyraǵynda izi qalǵan áıgili Asan qaıǵy, Móńke Tileýuly, Shernııaz Jarylǵasuly, Aqtan Kereıuly, Ábýbákir Ker­deri Sarysholaq Boranbaıuly, Sary Bataquly, Qyzyl Tur­dalyuly, Tarazy Kálenqyzy, Táńirbergen Moldabaı, Nurpeıis Baıǵanın sııaqty jyraýlar men halyq kompozıtorlarynyń shy­ǵarmalary, óńirdiń án sheber­leri men termeshileri oryndaýynda keń taralǵan dástúrli halyq ánderi, kóneden kele jatqan halyq kúıleri men dáýlesker kúıshi Qazanǵaptyń jáne onyń izbasarlarynyń kúı­leri toptastyrylǵan. Sony­men qatar, qazirgi zamanǵy qa­zaq mýzyka óneriniń negizin qa­laý­shy, akademık Ahmet Jubanovtyń, aqyn-kompozıtor Bákir Tájibaevtyń shyǵarǵan ánderi, kórnekti jerles aqyndar Q.Shańǵytbaev, S.Jıenbaev, M.Aqdáýletuly, E.Ashyqbaev jáne basqalardyń sózderine jazylǵan tanymal kompozıtorlar men jergilikti sazgerlerdiń shyǵarmalary engizilgen. Mádenı muranyń tusaý­keserinde sóz alǵan Qazaqstannyń mádenıet qaıratkeri Erkin Qurmanbekov, Qazaqstannyń eń­begi sińgen mádenıet qaırat­keri, kompozıtor Qaıyrǵalı Qojanbaev óńirdiń mýzykalyq murasyn toptastyryp, aýdıo­jınaq shyǵarý arqyly úlken is tyndyrylǵanyn atap ótti. Sondaı-aq, bul óńirde ómir súrgen óner ıeleriniń baı muralarynyń joǵalmaýyna, keıingi urpaqqa saf altyndaı taza kúıinde sa­­baqtasa jetýine alǵyshart ja­saı­tynyn jet­kizdi. Aqyn-jy­raý Nurpeıis Baı­ǵanınniń uly, kúıshi Momyn Baıǵanın má­denı muranyń tusaý­keserine jı­nalǵandarǵa batasyn berip, Qazanǵaptyń kúılerin oryndady. Talantty kúıshi Jaılaý Asylhanovtyń oryndaýyndaǵy Qazanǵaptyń umytylyńqyrap bara jatqan «Nar ıdirgen» kúıi kórermenderdiń kóńilin tereń tebireniske bóledi. Satybaldy SÁÝIRBAI, «Egemen Qazaqstan». Aqtóbe oblysy.