Atyraýda «Nur Otan» partııasynyń shtaby quryldy

ATYRAÝ. 2 aqpan. Atyraýda «Nur Otan» partııasynyń óńirlik saılaýaldy shtaby quryldy. Onyń quramyna partııa jáne qoǵam qaıratkerleri, saıası keńes músheleri, ardagerler men túrli sala mamandary endi. Bul týraly partııanyń óńirlik fılıalynyń baspasóz qyzmetine silteme jasaǵan egemen.kz tilshisi habarlady. Qazir Atyraý oblysynda «Nur Otan» partııasynyń 136 bastaýysh uıymy jumys isteıdi. Munda partııanyń 31 myńnan astam múshesi bar. Partııanyń óńirdegi saılaýaldy shtabyna ardagerler men ǵalymdardan, dárigerler men muǵalimderden, munaıshylardan quralǵan 45 adam endi. Shtabqa «Nur Otan» partııasy Atyraý oblystyq fılıaly tóraǵasynyń birinshi orynbasary Erbolat Bektemirov jetekshilik etedi. Shtab jetekshisiniń aıtýynsha, Atyraý qalasynda jáne 7 aýdanynda qurylǵan shtabtar quramyna partııanyń 210 múshesi enip otyr. Shtabtar jumysy 20 aqpanda bastalady. Joldasbek Shópeǵul. Derek: egemen.kz. Sýret: Rahym Qoılybaev.