ASTANA. 2 aqpan. 1 aqpan kúni Almaty qalasynda otandyq "Mezet ılı prosto jızn" atty jańa kórkem fılmniń tusaýkeseri ótti. Bul týraly egemen.kz tilshisi habarlady.
Qazaqstandyq tolyq metrajdy fılmniń rejısseri Aqjol Ábilovtiń aıtýynsha, kınonyń ıdeıasy ssenarıst Ardaq Qaryqbolovamen birlesken avtorlyqta jasalǵan. Kınotaspany jasaý Qazaq ulttyq óner ýnıversıteti stýdentiniń kýrstyq jumys úshin taqyryp izdeýinen órbigendikten, bastapqyda fılm qysqa metrajdy týyndy retinde oılastyrylǵan eken. Alaıda oqıǵa sony sıýjettermen, keıipkerlermen tolyqtyryla kele, ssenarıı shynaıy ómir jaǵdaılaryna negizdelgen fılmge aınalǵan.
Rejıserdiń aıtýynsha, fılmniń mazmuny óte qarapaıym. Sondyqtan ol óziniń shynaıylyǵymen ári naqtylyǵymen kórermendi baýrap alady. Fılmniń basynda kórermenderge kartınanyń basty keıipkeri – Asqar esimdi azamat tanystyrylady. Azamat boıdaq ári tabysty jigit bolady. Ol dostyqty baǵalamaıtyn, mahabbattyń ne ekendigin túsinbeıtin jáne aınaladaǵy adamdardy syılamaıtyn jigit bolyp shyǵady. Kúnderdiń bir kúninde Asqar kenet esin joǵaltady. Odan keıin únemi aýrýhanada jatý, emdelý, medısınalyq tekseristerden ótý ony tipten abyrjytyp jiberedi. Dárigerler oǵan údemeli mı isigi dıagnozyn qoıady. Sodan Asqar bir aı ǵana ómiri qalǵanyn estip, tereń kúızeliske túsedi. Sóıtip, ishimdikke salynyp júrip, ol bir kúni taǵdyrdyń tálkegimen áldebir aýylǵa tap bolady. Mine, osy eldi mekende Asqar erekshe bir oqıǵaǵa kezigedi. Sonyń arqasynda Asqar múldem ózgeredi, qarym-qatynasty, ómirdi jáne mahabbatty baǵalaı bastaıdy. Fılmniń aqyry odan da qyzyqty, oǵan kórermender ózderi tamashalaǵanda kýá bolady. "Mezet ılı prosto jızn" fılminiń kórsetilimi 4 aqpanda bastalady dep josparlanyp otyr.
"Mezet ılı prosto jızn" fılmi –elimizdegi eń jas rejısserdiń tyrnaqaldy dúnıesi, alǵashqy tolyq metrajdy jumysy. Fılmdegi basty roldi tanymal otandyq ártis – Nurjan Sadybekov oınaıdy. Sonymen qatar, kórermender fılmde Nurjan Tutov, Gúlbahram Baıbosynova, Almat Saqatov, Erden Telemisov, Azat Seıtmetov sekildi ártisterdi kóre alady.
Dastan Kenjalın.
Derek, sýret: egemen.kz
