Ury terezege keptelip qaldy

Úı tonap, qalta qaǵyp úırengen ury­lardyń dáıim degenderi bolyp, oıla­ǵandary oryndalyp jatpaıdy. Olardyń jospary ózine qurylǵan tuzaq bolyp, alǵan jymqyrmasynyń ózin áp-sátte ustap berer «kózge» aınalyp jatatyn tustary az emes. Osyndaı qylmystyq ári qyzyqty oqıǵalardyń biri jýyrda Mańǵystaý óńirinde tirkeldi. Kúızelte otyryp, ezý tarttyrarlyq oqıǵa Mańǵystaý oblysynyń Qaraqııa aýdanynyń ortalyǵy – Quryq aýylynda boldy. 69 jastaǵy aýyl turǵynynyń quqyq qorǵaý oryndaryna jazǵan shaǵymyna qaraǵanda, ol keshke taman óz aýlasyna shyǵyp, qaqpalardyń durys jabylǵan-jabylmaǵandyǵyn tekserip júredi. Kenet qulaǵyna tereze jaqtan áldebir daýys shalynǵan. Ol dybys shyqqan jaqqa kelse, úıge tereze arqyly kirmek bolǵan er adamnyń terezege syımaı keptelip turǵanyn kóredi. Ilinip turǵan uryny jaqsylap turyp bir teýip alǵan úı ıesi úıge kirip polısııa shaqyrady. Tártip saqshylary kelgende, esikten bóksesi syımaı qalǵan «aıýdaı» bolyp keptelip turǵan ury jan-dármeni shyǵyp, qashyp ketken eken. Alaıda, polıseıler kúdiktini dereý anyqtap, ustap úlgergen. Ol sol aýyldyń 32 jastaǵy turǵyny bolyp shyqty. Qazirgi tańda kúdiktiniń ústinen sotqa deıingi tergeý júrgizilýde. Osyǵan uqsas oqıǵa Aqtaý qalasynda da bolǵanyn atap ótken jón. Oblys ortalyǵynyń 15-shaǵyn aýdanynda úı ıesi esigin ashyq tastap, kórshisiniń úıine ketedi. Kórshisiniń sý jańa teledıdaryn kórip, tamashalap 20 mınýtta úıine oralsa, úıine belgisiz er adam kirip alǵan. Úı ıesin kórgen boıda tura qashqan ury qolyna uıaly telefondy ile ketedi. Desek te, asyǵyp bara jatqan ol abaısyzda telefondy qolynan túsirip alady. Al onda urynyń saýsaq izderi qalǵan bolatyn. Osylaısha jemtigi ózine qurylǵan qaqpanǵa aınalǵan ury uzaqqa barmady – quqyq qorǵaý oryndarynyń bazasynda saqtalǵan saýsaq izine qarap anyqtaǵanda, onyń buryn sottalǵan kánigi qylmysker ekeni naqtylandy.  Gúlaıym ShYNTEMIRQYZY, «Egemen Qazaqstan». Mańǵystaý oblysy.