Basty maqsat – el úmitin aqtaý

Keshe Astanada Qazaqstan Kommýnıstik halyq partııasynyń (QKHP) kezekten tys H sezi ótti. Oǵan partııa hatshylary, QKHP Ortalyq komıtetiniń músheleri, uıymnyń oblystyq, qalalyq, aýdandyq komıtetteriniń delegattary qatysty. Jıynda partııanyń Parlament Májilisi men barlyq deńgeıdegi máslıhattar saılaýlaryna qatysýy týraly sheshimi shyǵarylyp, uıymnyń saılaýaldy baǵdarlamasy qabyldandy jáne Májilis depýtattyǵyna kandıdattardyń partııalyq tizimi bekitildi. Jıynda sóz alǵan Qa­zaqstan Kommý­nıstik halyq partııasynyń jetekshisi Vladıslav Kosarev Elbasy Nursultan Nazarbaevtyń Parlament Má­ji­lisiniń saılaýyn kezekten tys ótkizý týraly sheshimi der kezinde qabyl­dan­ǵa­nyn aıta kelip, uıymnyń alǵa qoıyp otyrǵan maqsat-mindetterin atap kór­­setti. «Qazaqstan kommýnıstik halyq par­­tııasynyń aldynda saılaý naýqanyn aby­roımen ótkizý mindeti tur. Bizdiń par­tııamyzdyń basty mindeti – saılaýshy­lardyń úmitin aqtap, eldiń birligin nyǵaıtý maqsatynda zań shyǵarýshy organǵa jańa qurammen tyń ıdeıalardy alyp barý», – dedi V.Kosarev. Sonymen qatar, spıker uıymnyń basymdyq berip otyrǵan baǵyttaryna toqtaldy. «Bizdiń partııa qoǵamymyzda ózin­dik áleýetke ıe. Biz Memleket basshy­synyń júrgizip otyrǵan salıqaly saıasatyn qýattap ári halqymyzdyń birligi men yntymaǵynyń nyǵaıa túsýine atsalysa beremiz. Sondaı-aq, biz aldyńǵy qatarly 30 eldiń qataryna qosylý maqsatynda ba­tyl qadamdar jasap otyrǵan elimizde iske asyrylý ústindegi áleýmettik-ekono­mı­kalyq reformalardyń tabysty júrgi­zilýine óz úlesimizdi qosqymyz keledi», – dedi ol. Odan ári partııa jetekshisi uıymnyń negizgi ıdeıalyq ustanymdaryn sóz etti. «Biz san ǵasyrlar boıy adamzattyń oıshyldaryn Batystyń tutynýshy mádenıetine qarsy jigerlendirgen kommýnızmniń ja­sampaz ıdeıalaryna berikpiz. Ǵylymı kom­mýnızm ustanymdary turǵysynan qara­ǵanda, daǵ­darys jahandyq jáne trans­ult­tyq kor­porasııalardyń basymdyǵyn dá­lel­deı­tin neolıberalızm teorııasynyń qul­­dy­ra­ǵanyn kórsetedi», – dedi V.Ko­sarev. Sonymen qatar, spıker qazirgi tańda búkil álemdi alańdatyp otyrǵan qarjy daǵ­darysy men túrli syn-qaterlerdi atap ótti. Elba­sy usynǵan «100 naqty qadam» Ult Jos­pary – daǵdarysty eńserýdiń kepili. Son­daı-aq, ol elimizdi kemel keleshekke jeteleıtin Ult Josparynda qamtyl­ǵan ózekti máselelerdi júzege asyrý jalpy­halyqtyq is ekenin, osy oraıda, qazaq­standyq halyqshyl kommýnıster de naqty jumystar atqaratynyn atap ótti. Sóziniń sońynda V.Kosarev óziniń par­tııalas áriptesterin aldaǵy saılaý naý­qanynda belsendilik tanytýǵa úndedi. Qazaqstan Kommýnıstik halyq partııasynyń hatshysy Turǵyn Syzdyqov óz kezeginde aldaǵy 20 naýryzda ótetin saılaýdyń mańyzyna toqtaldy. «Bizdiń partııamyz ótken jyldardaǵy saılaý naýqandarynda mol tájirıbe jınaqtaı bildi. Aldaǵy ýaqytta ótkeli otyrǵan saı­laý naýqany partııamyzǵa eleýli synaq bolǵaly tur. Biz halqymyzdyń úmitin aqtap, olardyń múddelerin qorǵaý­ǵa múmkindik alý úshin saılaýǵa joǵary deńgeıde daıyndalyp, belsene qatysýy­myz qajet», – dedi partııa hatshysy. Sonymen qatar, ol qazirgi tańda oryn alyp otyrǵan álemdik daǵdarys pen túrli syn-qaterlerge laıyqty tosqaýyl qoıý úshin zań shyǵarý oryndarynyń belsendi is-qımyldar jasap, qalyptasqan ahýaldy durys baǵalaı bilýi kerektiginiń mańyzdylyǵyn sóz etti. Onyń aıtýynsha, daǵdarysty eńserý úshin Memleket basshysy Nursultan Nazarbaev usynǵan «100 naqty qadam» Ult Josparyn iske asyrý qajet. Osynaý baǵdarlamada atap kórsetilgen mindetterdi abyroımen oryndaýǵa qazaqstandyq halyqshyl kommýnıster de óz úlesterin qosýǵa daıyn. Sezd barysynda Turǵyn Syzdyqov Batys mádenıetiniń keleńsiz tustaryn sóz ete kelip, rýhanı ómirimizge keri áserin tıgizip otyrǵan birqatar túıtkilder turǵysynda áńgime qozǵady. «Batys halyqtary rýhanı daǵdarystyń jaǵymsyz áserin sezinip otyr. Rýhanı qundylyqtarǵa qatysty túrli kózqarastar beleń alýda. Batys mádenıeti, ómir salty birinshi kezekke materıaldyq qundylyqtardy shyǵardy. Biz batystyq jónsiz úrdisterge úzildi-kesildi qarsymyz», – dedi T.Syzdyqov. Onyń aıtýynsha, batystyq mádenıet pen ómir súrý saltynan týyndap otyrǵan kóptegen keleńsiz áreketter, ásirese, batystyq jastardyń betalysy, olardyń ómirge degen keıbir kózqarastary bizdiń qoǵamymyzǵa jat jáne óte zııandy. Sonymen qatar, partııa hatshysy Turǵyn Syzdyqov Prezıdent Nursultan Nazarbaevtyń el aldyna qoıyp otyrǵan mindetterin júzege asyrýda Qazaqstan Kommýnıstik halyq partııasynyń bar múmkindiginshe qyzmet etetinine sendirdi. Sezde birqatar delegattar minberge kóterilip, partııanyń aldynda turǵan aýqymdy mindetter jóninde sóz qozǵady jáne óz áriptesterin saılaý naýqanyna aýyzbirshilikpen qatysýǵa shaqyrdy. Olardyń aıtýynsha, elimizde qolǵa alynyp jatqan ıgi sharalardyń barlyǵy da memleketimizdiń damýyna ózindik yqpalyn tıgizedi. Ásirese, el birligi, halyq ynty­maǵy turaqtylyq pen ornyqty damýǵa kepil bola alady. Olardyń sózderine qara­ǵanda, Prezıdent Nursultan Nazarbaevtyń saılaý ótkizý jónindegi sheshimi óte durys bolǵan. О́ıtkeni, partııalardyń halyq tarapynan senimniń jańa mandatyn alýy depýtattardyń tyń serpilispen jumys isteýlerine jol ashady. Onyń ústine, saılaýda halqymyzdyń yntymaǵy, birligi, saıası belsendiligi anyq kórinýi tıis. Jıynda Qazaqstan Kommýnıstik halyq partııasynyń hatshysy, besinshi sha­qyrylym depýtaty Jambyl Ahmet­bekov Parlament Májilisine úmitkerlerdiń tizimin oqydy. Osylaısha, Qazaqstan Kommýnıstik ha­lyq partııasynyń H sezi óz jumysyn aıaqtady. Sezd sońynda oǵan qatysýshylar Qazaqstan Kommýnıstik halyq partııa­synyń saılaýaldy baǵdarlamasyn bir­aýyz­dan qabyldady jáne zańnama talap­­taryna saı 22 adamnan turatyn úmitker­lerdiń partııalyq tizimin bekitti. Joldybaı BAZAR, «Egemen Qazaqstan». Sýretti túsirgen Erlan OMAROV.