Elbasy Eýrazııalyq ekonomıkalyq komıssııa alqasynyń tóraǵasymen kezdesti

ASTANA. 25 aqpan. Elbasy Eýrazııalyq ekonomıkalyq komıssııa alqasynyń tóraǵasy Tıgran Sarkısıanmen kezdesti. Bul týraly akorda.kz habarlady. Kezdesý barysynda Eýrazııalyq ekonomıkalyq odaqty damytý, birlestiktiń úshinshi eldermen ekonomıkalyq qarym-qatynastar aıasyn keńeıtý máseleleri, sondaı-aq, EAEO-ǵa múshe elderdiń jahandyq naryqtarda qalyptasqan ahýal jaǵdaıyndaǵy ortaq is-qımyl strategııasy talqylandy. Memleket basshysy Tıgran Sarkısıannyń EEK Alqasyndaǵy tóraǵalyǵy álemdik ekonomıkadaǵy kúrdeli kezeńge tap kelgenin, mundaı jaǵdaıda ósimniń jańa múmkindikterin tabý ońaı emestigin aıtty. «Alaıda, bul kedergilerdiń bári Eýrazııalyq ekonomıkalyq odaqtyń jumysymen baılanysty emes. Bizdiń ıntegrasııalyq birlestigimizdiń túpki nátıjesinde paıdaly bolatynyna meniń esh kúmánim joq. Onyń ústine búginde kóptegen elder EAEO-ǵa múshe bolýǵa nemese onymen ortaq erkin saýda aımaǵyn qurýǵa tilek bildirip otyr. Daǵdarys – ýaqytsha qubylys, al bizdiń ekonomıkalarymyzdyń jalpy áleýeti men naryqtyń kólemi qala beredi», – dedi Nursultan Nazarbaev. Sonymen qatar, Qazaqstan Prezıdenti ıntegrasııalyq birlestikke múshe bolý múmkindikterdi paıdalanýdy ǵana emes, onyń damýyna úles qosý qajettigin de bildiretinin aıtty. Tıgran Sarkısıan Nursultan Nazarbaevtyń EAEO-nyń jalpy damý strategııasy boıynsha ustanymy eleýli mánge ıe ekenin, óıtkeni Qazaqstan Prezıdentiniń bastamasy men ıdeıalary osy biryńǵaı eýrazııalyq keńistiktiń negizi bolǵanyn atap ótti. EEK Alqasynyń tóraǵasy ıntegrasııalyq úderisterge Qazaqstan basshylyq jasaıtyn jyly damý tyń serpin alatynyna senim bildirdi. Tıgran Sarkısıan EAEO organdaryna Qazaqstan Prezıdentiniń Odaqqa múshe memleketterdiń basshylaryna arnalǵan úndeýin egjeı-tegjeıli zerdeleý tapsyrylǵanyn, sondaǵy negizgi jaıttardy júzege asyrý úshin tıisti jospar qurylǵanyn aıtty. Sondaı-aq, Memleket basshysyna EEK Alqasynyń qazirgi qyzmetiniń negizgi baǵyttary týraly baıandaldy. Elaman Qońyr. Derek, sýret: akorda.kz.