Saýaldama – tańdaý nátıjesiniń kórsetkishi

Qazaqstan Prezıdenti janyndaǵy Ortalyq kommýnıkasııalar qyzmetinde «Zakon.kz» aqparattyq portaly men «Qoǵamdyq kelisim» zertteý ınstıtýty ókilderiniń qatysýymen brıfıng ótti. Brıfıng saılaý naýqany aıasynda áleýmettik zertteýler júrgizýdiń barysyna arnaldy. «Zakon.kz» aqparattyq por­talynyń bas redaktory Qaırat Shaıhıev: «Elimiz mańyzdy saıa­sı oqıǵanyń qarsańynda turǵanyn bilesizder. 20 naýryz kúni Qazaqstanda Parlament Májilisi men barlyq deńgeıdegi máslıhattar depýtattarynyń saılaýlary ótedi. Búginde úgit-nasıhat is-sharalary bastalyp ketti. Osyǵan baılanysty «Zakon.kz» aqparattyq portaly aldaǵy saılaýǵa jáne onyń ótkizilý barysyna baǵa berý úderisine qatysý týraly sheshim qabyldady. Biz ózimizge seriktes retinde «Qoǵamdyq kelisim» zertteý ınstıtýtyn tańdadyq», – deı kele, elektoratty kezeń barysynda saılaýshylar arasynda saýaldama júrgiziletinin, bul el turǵyndarynyń saılaýǵa, saıası naýqanǵa qatysyp otyrǵan úmitkerlerge qatysty habardar bolyp, aqparat alýyna múmkindik beretinin jetkizdi. «Qoǵamdyq kelisim» zertteý ınstıtýtynyń atqarýshy dırektory Aıgúl Sádýaqasova da elde mańyzdy saıası naýqannyń júrip jatqanyna toqtaldy. «20 naýryz kúni «Qoǵamdyq pikir» zertteý ınstıtýty óziniń zertteý-saraptaý jumystaryn uıymdastyryp, saılaý ýchaskelerinen shyqqan saılaýshylar arasynda saýaldama júrgizedi. Bul – jalpy standartty ádis. Qazaqstanda ǵana emes, barlyq elde de osyndaı tájirıbe bar. Osy zertteý ádisi boıynsha árbir besinshi saılaýshy saılaý ýchaskesinen belgili bir kandıdatqa daýys berip shyqqannan keıin arnaıy saýaldamaǵa qatysyp, jaýap beredi. Oǵan Qazaqstan boıynsha barlyq oblystar jáne Astana men Almaty qalalarynyń saılaýshylary qamtylady. Sonyń ishinde elimiz boıynsha 110 saılaý ýchaskesin qamtýdy kózdep otyrmyz», – dedi ol. Sondaı-aq, olardyń arasynda oblys ortalyqtary men Astana jáne Almaty qalalarynan 56 saılaý ýchaskesi, shaǵyn qalalardan 28 saılaý ýchaskesi, sonymen qatar, aýyldyq okrýgterden 26 saılaý ýchaskesi iriktelip alynǵanyn aıtty. Al zertteýge qatysý úshin Qazaqstannyń barlyq óńirinen 200-ge jýyq suhbattasýshy qamtylmaq eken. «Negizgi qorytyndylar jalpylama túrde zańmen bekitilgen erejelerge sáıkes, sol kúnniń sońynda ǵana beriledi. BAQ úshin 21 naý­ryz kúngi túngi saǵat 00.00-de saýaldamanyń qorytyndysy arnaıy aıtylatyn bolady», – dedi Á. Sádýaqasova. Láıla EDILQYZY, «Egemen Qazaqstan». ASTANA.