Lıtva Muhtar Ábilázovtiń qaınysyna baspana berdi

ASTANA. 27 aqpan. Lıtva mıllıon dollardan astam aqshany urlap ketti degen kúdik tańylyp otyrǵan qazaq azamaty - BTA Bank-tiń burynǵy basqarma tóraǵasy Muhtar Ábilázovtiń áıeliniń inisi, ıaǵnı qaınysy Syrym Shalabaevqa saıası baspana berdi. Bul týraly ras.kz deregine súıengen egemen.kz tilshisi habarlady. Lıtva portaly atalǵan qazaq azamatynyń mıllıarder bolýy da múmkin ekenin atap kórsetedi. Basylymnyń habarlaýynsha, Syrym Shalabaevty ótken jyly jazda «Arasa» qyzmetkerleri Vılnıýske kelgen jerinde qolǵa túsirgen bolatyn. Eske sala keteıik, Shalabaev soǵan deıingi eki jyldan astam ýaqyt «Interpoldyń» izdeýinde bolǵan. Al Qazaqstan azamatyna bosqyn mártebesin berý jónindegi sheshimdi kóshi-qon departamenti qabyldaǵan. Mundaı sheshimge ol 9 aıdan astam ýaqytqa sozylǵan tekserýden keıin kelgen. Onyń múddesin munda advokat Laımonas Iýdıskas qorǵaǵan. Qorǵaýshy baspananyń qandaı jaǵdaıda berilgeni týraly aıta almaıtynyn, sebebi, bul memlekettik qupııa bolyp tabylatynyn, ony tek osyndaı aqparmen jumys jasaýǵa ruqsaty bar qyzmetkerler ǵana ala alatynyn jetkizdi. Endi kóshi-qon departamenti qabyldaǵan sheshim jýyq ýaqyttarda Vılnıýs okrýgtiń sotyna ótkizilýi tıis. Ony qazaq azamatynyń ekstradısııasyna baılanysty máseleni qarap jatqan Lıtva bas prokýratýrasy usynatyn bolady. Al Shalabaevty ózderine berýdi Qazaqstan men Ýkraına surap otyr. Iýdıskastyń aıtýynsha, kóshi-qon departamenti joǵarydaǵydaı sheshim qabyldamas buryn Qazaqstanda, Ýkraınada, Latvııada, Ulybrıtanııa men basqa da elderde bar múmkin bolǵan aqparlardy jınap alǵan. Buǵan deıin Shalabaev 6 jyldaı ýaqyt álemniń ártúrli elderinde turyp kelgen. Biraq solardyń birde-birinde ony Qazaqstan saıası sebeptermen qýǵynǵa túsirip keledi, degen sóz aıtylmaǵan. Rýslan Igilik. Derek, foto: ras.kz.