Astanada fýtbol matchy kezinde kólik qozǵalysy shekteledi

ASTANA. 29 aqpan. 8 naýryzda «Astana Arena» stadıonynda fýtboldan elimizdiń qazirgi chempıony «Astana» komandasy men Almatynyń «Qaıraty» Qazaqstan Sýperkýbogyn sarapqa salady. Osyǵan oraı match ótetin ýaqytta qalada kólik qozǵalysy shekteledi. Bul týraly Astana qalasy ákimdiginiń resmı saıty – astana.gov.kz-ke silteme jasaǵan egemen.kz tilshisi habarlady. Oıyn saǵat 15:00 bastalady. Saǵat 13:00 Qabanbaı batyr jáne Turan dańǵyldary boıynda Kereı men Jánibek handar kóshesinen Hýseın ben Talal kóshesine deıingi bóliginde kólik qozǵalysy toqtatylady. Joldar match sońyna deıin jabyq bolady. Sondyqtan áýejaıǵa baratyn astanalyqtarǵa jáne jaqyn mańdaǵy eldi mekenderdiń turǵyndaryna polıseıler aınalyp ótý joldaryn aldyn ala josparlaýdy usynady. Eń yńǵaıly jol – Orynbor kóshesi arqyly júrý. Dástúr boıynsha fýtbol áýesqoılary úshin arnaıy transfer uıymdastyrylady. Avtobýstar jankúıerlerdi bes jerden alyp ketedi. Olar: «Qazaqstan» sport saraıynyń janyndaǵy turaq, Qajymuqan Muńaıtpasov atyndaǵy stadıonnyń, «Áziret Sultan» jáne «Nur Astana» meshitteriniń janyndaǵy turaqtar, sondaı-aq, elordalyq sırk janyndaǵy turaq. Astana qalasy ishki ister departamenti jergilikti polısııa qyzmeti jankúıerlerdi bul kúni qoǵamdyq kólikti paıdalanýǵa shaqyrady. Elaman Qońyr. Derek, sýret: astana.gov.kz.