Aqtóbede tatýlastyrý rásimderine arnalǵan dóńgelek ústel ótkizildi

AQTО́BE. 29 aqpan. Aqtóbe oblystyq sotynyń ǵımaratynda «Qazaqstan Respýblıkasynyń jańa Azamattyq prosestik kodeksi boıynsha tatýlastyrý rásimderi» taqyrybynda dóńgelek ústel ótkizildi. Bul týraly egemen.kz tilshisi habarlady. Jıyndy oblystyq sottyń azamattyq ister boıynsha sot alqasynyń tóraǵasy Nursapa Prımashev qysqasha sóz sóılep ashty. Dóńgelek ústel aıasynda oblys boıynsha «Medıasııany damytý ortalyǵy» respýblıkalyq qoǵamdyq birlestik ókildiginiń medıatory Sáýle Sıdahmetova, Aqtóbe qalalyq sotynyń sýdıasy Marına Zaınýllına, oblystyń mamandandyrylǵan aýdanaralyq ekonomıkalyq sotynyń sýdıasy Marııa Sharıpova, oblystyq sot sýdıasy Baqytjamal Almatovanyń  baıandamalary tyńdaldy. Kún tártibinde jyljymaıtyn múlikpen mámileler jáne medıatıvtik kelisim, jańa kodekstegi tatýlastyrý rásimderi boıynsha jańashyldyqtar, bitimgershilik kelisimi, daýdy beıbit jolmen retteý – azamattyq sot óndirisiniń jańa talaby syndy ózekti máseleler talqylandy. Shara barysynda dóńgelek ústelge qatysýshylar ózara pikir almasyp, sýdıalar medıatorlar men qorǵaýshylardyń suraqtaryna jaýap berdi. Satybaldy Sáýirbaı. Derek, sýret: egemen.kz.