«Máńgilik El» saıabaǵy – aqsýattyqtardyń súıikti seıil orny

Tarbaǵataı aýdanynyń ortalyǵy – Aqsýat aýylynyń kórkeıýi men órkendeýi aýdanymyzdyń, óńirimizdiń, tipti, elimizdiń jyldan jylǵa damyp, gúldenip kele jat­qanynyń bir kórinisi dep bilemiz. Kez kelgen aýdan ortalyǵy shetten keletin meımandar úshin óńirdi tanystyratyn negizgi eldi meken bolyp tabylady. Sońǵy jyldardyń bederinde aýdanymyzdyń áleýmettik-ekonomıkalyq damýyndaǵy oń ózgeristerden bólek, týǵan jerimizdiń kelbeti men mádenıeti kúnnen-kúnge ózgerip, túrlenip keledi. Máselen, Aqsýat aýylynda kóptegen kósheler asfalttalyp, jaryq shamdary ornatyldy. Aýyldyń ár tusynda kóz tartarlyq kórikti eskertkishter qoıyldy. Onyń basym bóligi el men jer tarıhymen úndes. Elordamyzdaǵy «Báıterek» monýmentiniń kishigirim nusqasy týra aýyl ortalyǵynda menmundalasa, Tarbaǵataı jeriniń qaıtalanbas relefiniń kórinisi ispetti «Bóritastaǵan» eskertkishi alys joldan kelgen jolaýshyny aýdan ortalyǵyna kireberiste qarsy alady. Qazaqtyń qadirli jón-joralǵysymen, táýelsiz elimizdiń asyǵy árdaıym alshysynan tússin degen nıetpen Qazaqstandaǵy eń alyp asyqtyń eskertkishi Aqsýat aýylyna ornatyldy. Sondaı-aq, bir jyl buryn paıdalanýǵa berilgen «Máńgilik El» saıabaǵy aýylymyzdyń kelbetine, kórkine aınalǵan aıryqsha nysan ekenin aıtqymyz keledi. Buryn aýdandyq máslıhat, aýdandyq bilim berý bólimi jáne aýdandyq zeınetaqy tóleý ortalyqtary aýlalarynyń keıbir nazardan tys bóligi qoqysqa tolyp jatatyn. Osy olqylyqtyń ornyn toltyrý úshin aýdan ákimi Dildábek Orazbaevtyń tapsyrmasymen bul alańdar tolyǵymen tazalanyp, búginde aýdan halqynyń mádenı demalys ornyna aınaldy. «Máńgilik El» saıabaǵynyń jalpy kólemi – 2175 sharshy metr. Saıabaqtyń orta tusynda shilińgir ystyqta mańaıyna salqyn lep syılap, kóńilińizdi kóteretin sýburqaq ornalasqan. Qazirgi zamanǵa saı tolyǵymen jaryqtandyrylyp, abattandyrylǵan demalys aımaǵy, ásirese, balalarymyz ben neme­relerimizdiń kózqýanyshyna aınalyp otyr. Munda balalardyń balǵyn shaǵyn este qaldyrý maqsatynda arnaıy dońǵalaqty poıyz júredi. Búldirshinderdi shaǵyn vagondaryna otyr­ǵyzyp alatyn jyljymaly poıyz 15 aıaldamada toqtap, jergilikti jer bederimen tanystyrady. Iаǵnı, saıabaq aýmaǵyndaǵy ár aıaldamaǵa aýdan kólemindegi geografııalyq ­ataýlar berilgen. «Tarbaǵataı taýy», «Mańyraq jo­tasy», «Bóritastaǵan», «Shorǵa ózeni», «Yrǵyz­baı ata kesenesi» ispetti aýdannyń bel­­gili jer ataýlaryna ıe beketter balalardy bir ja­­ǵynan týǵan ólkemen tanystyrsa, ekin­shi ja­ǵynan shat-shadyman shattyqqa bóleıdi. Atalǵan saıabaǵymyzdyń «Máńgilik El» atanýynda tereń mán bar. «Otan otbasynan bastalady», «El bolamyn deseń, besigińdi túze» dep halqymyz beker aıtpaǵan. Elbasy Nursultan Nazarbaevtyń álemniń 30 damyǵan eliniń qataryna qosylýǵa jeteleıtin «Qazaqstan-2050» Strategııasy men «Máńgilik El» ıdeıasy ózektiliginiń bir ushy óskeleń urpaqty tárbıeleýde jatyr. Sondyqtan, shalǵaıdaǵy shekaralyq óńirde elimizdiń bıik maqsat-mindetterimen qabysqan qabyrǵaly jobalardyń qolǵa alynýy qarapaıym turǵyndardy shyn máninde qýanyshqa bóleıdi. Halyq ıgiligi – ortaq qýanysh. Sondyqtan, balalardyń rııasyz kóńiline qanat baılaǵan jergilikti el tizginin ustaǵan azamattarǵa alǵys aıtamyz. Muqan SAHARIEV, Tarbaǵataı aýdandyq ardagerler keńesiniń tóraǵasy. Shyǵys Qazaqstan oblysy.