«Aq jol» jumysshylarmen júzdesti

«Fabrıka POSh-Taraz» jaýap­ker­shiligi shekteýli seriktectigi – oblysta ótpeli kezeń qıyndyqtaryn eńserip, saqtalyp qalǵan jáne jumysyn qaıta jandandyrǵan kásiporynnyń biri. Kásiporynda memleket qoldaýymen Údemeli ındýstrııalyq-ınnovasııalyq damý baǵdarlamasy aıasynda ónimdi óńdeý jolynda eleýli sharalar qolǵa alynyp, júzege asyrylýda. Munda 2010 jyly Indýstrııalandyrý kartasyna engizilgen tops óndirý jobasy júzege asyryldy. Keshegi apta sońynda «Aq jol» par­tııa­synyń ókilderi Taraz qalasyn­daǵy osy kásiporynda bolyp, jumysshy­lar­men kezdesip, úgit-nasıhat jumystaryn júrgizdi. – Búgin bizdiń partııanyń ókilderi teri-jún óńdeýmen aınalysyp jat­qan jumysshylarmen júzdesip, kásip­orynnyń qazirgi tirshiligimen tanysyp, alǵa qoıǵan maqsattaryn bildi. Árıne, jeńil ónerkásibimizdiń damýyna zor úles qosýǵa qaýqary bar jún óńdeý salasyna ázirge sheteldikterdiń ǵana qyzy­ǵý­shylyǵy bolyp tur. Sondyqtan, bizdi otandyq kásipkerlerdiń shetelderdegi múddeleriniń qorǵalýy qyzyqtyrady, dedi «Aq jol» partııasynyń ókili Bolat Momyshev. Sondaı-aq, kezdesý barysynda ki­lem, kıim-keshek toqýǵa arnalǵan bul ónim qazir álemdik deńgeıde tapshy ekeni aı­tyldy. О́z kezeginde partııa múshe­leri bıznesti damytý úshin aldymen báse­kelestikti arttyrý, baǵany tómen­detý qaǵı­dalaryn qoldaný jaǵyn usyna­tyn­dyqtaryn kóldeneń tartty. Jıyn barysynda, sondaı-aq, partııa jarııalaǵan baǵdar­lamadaǵy kásipkerlerdi qoldaýǵa baǵyt­talǵan ózge de usynystar aıtyldy. Onyń ishinde jekemenshik bıznes­ti qoldap júrgen ulttyq damý ınstı­týt­tarynyń qyzmetine baqylaýdy kúsheı­tý, kásipkerlikti damytýǵa bólingen mem­lekettik qarajatty paıdalaný tıimdi­ligin qamtamasyz etý jaıy sóz boldy. Shynynda, ónerkásip órkendemeı kóse­gemiz kógermeıdi. Bul kúni aqjol­dyq­tar «Taraz metallýrgııa zaýyty» JShS-niń de jumysymen tanysty. Sondaı-aq, sońǵy jyldary óndirisi órkendep kele jatqan Jańatas qalasynda bolyp, jergilikti turǵyndarmen kezdesti. Kez­de­sýde partııanyń saılaýaldy baǵdar­la­masyndaǵy basymdyqtar týraly jan-jaqty áńgime qozǵaldy. Máselen, jas memlekettiligimizdiń bastaýynda turyp, onyń qalyptasýy men damýynyń kýási ári tikeleı qaty­sý­shysy bolýymyz bizdi maqtanysh sezi­mine bóleıdi, dedi aqjoldyqtar. Sonymen birge, qazirgi kezeńde elimizdiń aldynda ýaqtyly jáne laıyqty nazar aýdarýdy talap etetin jańa tarıhı qajettilikter turǵanyna nazar aýdartyldy. Basqasha aıtqanda, jaqsylyqqa qaraı únemi umtylý kerektigi atap kórsetildi. Oralhan DÁÝIT, «Egemen Qazaqstan». Jambyl oblysy.