Baıqaýshylar bas qosty

Baıqaýshylar D.A.Qonaev atyndaǵy Eýrazııalyq zań akade­mııa­synyń konferens-zalyna jınaldy. Dáris barysynda árbir baıqaý­shynyń Konstıtýsııany, «Saılaý týraly» Zańdy, sondaı-aq, baı­qaý­shynyń tikeleı mindetterin jete bilý kerektigi qaıtalaı eskertilip, tyń­daý­shylardyń jady shyńdaldy. Baıqaýshy ózine tıesili mindetine tek saılaý ótetin bıylǵy 20 naýryz kúnin kútpeı, dál búginnen bastap kirisýi kerektigi qaıta-qaıta eskertildi. Sondyqtan da semınar-trenıngten shyqqan boıda árbir baıqaýshy ózderine bekitilgen saılaý ýchaskelerine baryp, is-sharanyń ótý barysymen tanysýy tıis. Eń aldymen, saılaýshylardyń barlyǵy birdeı tizimge alynǵan-alynbaǵany tekseriledi. – Búgin biz saılaý naýqany bastalǵaly Almaty baıqaýshylarymen ekinshi ret semınar-trenıng ótkizip otyrmyz, – dedi komıssııa jetekshisi, akademııa rektory, professor, Qazaqstan Prezıdenti janyndaǵy Quqyqtyq saıasat keńesiniń múshesi О́miráli Jalaırı. – Qala bo­ıynsha barlyǵy 532 baıqaýshy bar. Komıssııa tóraǵasy retinde men buǵan deıin árbir partııanyń shtabynda bolyp, olardyń naýqanaldy jumysymen tanystym. Búgingi tańda bizdiń bir ǵana maqsatymyz bar, ol – Qazaqstan Respýblıkasy Parlamenti Májilisi men jergilikti máslıhattarǵa depýtattar saılaýyn joǵary dárejede, zań talaptaryna sáıkes oıdaǵydaı etip ótkizý. Saılaý – jergilikti ákimdik belsendileriniń aralasýynsyz ashyq ta taza ótýi tıis. EQYU baıqaýshylarynyń jáne de basqa da halyqaralyq baıqaýshy uıymdardyń aldynda júzimiz ashyq bolǵany durys. Olardyń tarapynan eshqandaı da bir eskertýler bolmaǵany maqul. Qazir Qazaqstandaǵy Parlament saılaýyna kúlli álem nazary aýyp otyr. О́tken jylǵy eldegi prezıdenttik saılaýda minsiz qyzmet atqarǵan barlyq baıqaýshylarǵa bul joly da sondaı leppen qyzmet istep, tııanaqtylyq kórsetý tapsyryldy. Almatyda «Zańgerler ádil saılaý úshin!» respýblıkalyq qoǵamdyq uıymy bar. Uıymnyń qurylǵanyna 10 jyldaı ýaqyt ótti. Jaýapty naýqannyń normatıvtik zań aktilerine sáıkes bolýyn osy uıymnyń belsendileri de qadaǵalap, bir kisideı atsalysatyn bolady. Jıynda baıqaýshylardyń osynaý belsendi uıymmen birlese, yntymaqtasa jumys isteýi týraly da aıtyldy. Talǵat SÚIINBAI, «Egemen Qazaqstan». ALMATY.