Exit-poll zertteýi júrgizildi

Keshe Astanada Bas redaktorlar klýbynyń prezıdenti Bıbigúl Jek­sen­baıdyń jáne «Medıa Konsýl» áleý­mettik agenttiginiń dırektory Iýrıı Cherkasovtyń qatysýymen aldaǵy 20 naýryzda ótetin saılaý kúni exit-poll zertteýin júrgizý týraly brıfıng ótti. Brıfıng barysynda B.Jeksenbaıdyń aıtýynsha, Bas redaktorlar klýby Qazaqstannyń 200-den astam BAQ basshylary men bas redaktorlary kiretin qoǵamdyq birlestik retinde elektoratty naýqan monıtorıngi arqyly saılaý naýqanyna qatysýdy mańyzdy dep sanaıdy jáne saılaý kúni ekzıt-poll zertteýin júrgizýge tapsyrys bergen. Zertteýdi «Medıa Konsýl» áleýmettik agenttigi júrgizedi. – Ekzıt-poll – damyǵan memleketterde keńinen taralǵan halyqaralyq tájirıbe. Bul biregeı áleýmettik málimetter alýǵa múmkindik beredi. Mundaı zertteýler saılaýdyń aıqyndylyǵyn, sondaı-aq, tutastaı elektorattyq mádenıetti arttyrady, – dedi B.Jeksenbaı. Iý.Cherkasov saılaý barysynda oblys ortalyqtarynda, shaǵyn qalalar men aýyldyq okrýgterde 225-teı daýys berý ýchaskesinde saýaldama júrgiziletinin atap ótti. – Zertteý aıasynda Astananyń jáne Almatynyń, sondaı-aq, árbir óńirdiń qalalyq jáne aýyldyq halqy tepe-teń usynylady. Saýaldamany ótkizýge 250-ge jýyq suhbat alýshy tartylady. Olardyń jumysyn 16 óńirlik menedjer úılestiredi. Saılaý týraly zańnamaǵa sáıkes, ekzıt-poll qorytyndysy BAQ pen qoǵamǵa 21 naýryzda saǵat 00:00-den keıin usynylady, dedi Iý.Cherkasov. Munymen qosa, ol saılaýaldy kezeńde monıtorıngtik taldaý júrgiziletinin aıtty. «Biz halyq arasynda júrgizilgen saýaldama arqyly jınalǵan málimetterdi usynamyz», – dedi «Medıa Konsýl» dırektory.