Shymkenttik «Moskvıch-412» kóligi Afına kóshelerinde júr

Taıaýda «Motor.kz» portalynda bir qyzyq foto jarııalandy. Onda kádimgi keńes úkimeti kezinde shyǵarylǵan eski «Moskvıch-412» Shymkent nómirimen túsi­rilipti. Bylaı qarasań, qyzyq fakt. Grekııa­nyń júregi – Afına qaıda, Qazaqstannyń kún sáýletti Shymkenti qaıda?! Osy Afınada Olımpıada oıyndary ótti. Qazaqstandyq sport delegasııasynyń quramynda barǵan Zııaddın degen jigit aǵasy, búginde marqum, bir qyzyq áńgime aıtyp berip edi. – Afınada daýdyrap bir top qazaq áńgime aıtyp bara jatyr edik, – deıdi Zákeń, – Kóshede otyrǵan bir aqsaqal ornynan atyp turyp, taza qazaqsha: «Iаpyraı, qazaqsyńdar ma?», – dedi. «Qazaqpyz. Shymkenttenbiz», – dedik tańyrqap. «Onda ishterińde qulshyǵash bar ma?». Zııaddınniń ózi qońyrat taıpasynyń qulshyǵash rýynan ǵoı. Biraz jigit kelemejdep kúlgen. Ol ant-sý iship tú­sindirdi. Sóı­tse, álgi aqsaqal Shymkenttiń Ken­taýynda turypty. Qarataýdyń tá­ji atanǵan Kentaý – Eýropanyń kóne qa­la­­laryna óte uqsaıdy. Qazaqstan qa­la­la­rynyń ishinde tóbede aspaly sham or­natylǵan velosıpedke arnalǵan joldy osy Kentaýdan kórgenbiz. Kentaýda grekter turǵan. Taǵdyr talaıymen Qazaqstannyń osy qalasyna jer aýdarylyp, ótken ǵa­syrdyń 90-jyldarynda tarıhı Otanyna qaıtqan grekter qazaqtarmen tonnyń ishki baýyndaı aralasyp ketken. Álgi Afınadaǵy grek qulshyǵashtyń bir azamatymen zamandas bolyp, jilik ustatqan dos eken. Keńestik kári tarlan «Moskvıchtiń» ıesimen Grekııaǵa segiz myń shaqyrym júrip kelýin osylaı túsindirýge bolady. Grekter Otanyna qaıtqan 90-jyldary «Moskvıch» búgingi «Mersedesteı» baǵaly edi. Búginde áli shymkenttik nómiri sheshilmegen IJ-412 Afınanyń Tharipou kóshesindegi №12 úıde 2009 jyldan beri tur desedi. Baqtııar TAIJAN, «Egemen Qazaqstan». ShYMKENT.