Jigit dep osyny aıt!

Búgingi kúnniń batyry deýge laıyqty jannyń biri – Qýanysh Berdenov Dossor kentinde turady. Osyndaǵy mádenıet úıinde jumys jasaıtyn ol ótken aptada áldebir sharýasymen ortalyq bazarǵa bettepti. Irgesi erte qalan­ǵan kenttiń tar kóshesinde qarsy jolyqqan ájeıdiń: «Balam-aı, ánebir páter órtenip jatyr-aý», – degen oqys daýsyn estip, soǵan qaraı tura júgirgenin ózi de ań­ǵarmaı qalypty. Janushyra jetken boıda páterdiń esigin asha almaı áýrelenip, aqyry terezesin syndyra ishke kirýge umtylady. Sóıtse, qoıý tútinnen eshteńe kórinbeıtin páterdiń ishinde úsh bala qalypty. «Sol sát eshteńeni oılaýǵa mursha bolmady. Bar oıym – ishtegi balalardy qutqarý», – dep eske alady Qýanysh Berdenov. Kózdi ashyp-jumǵandaı qas-qaǵym mezette qyzyl jalynnyń ortasynan qutqarylǵan úsh balanyń kishkentaıy áli mektep jasyna jetpegen eken. Úlkeni – 7, ortanshysy – 5, al kishkentaıy 3 jasqa tolypty. Bul baldyrǵandardyń kórer jaryǵy bar eken. Qýanysh olardy tysqa alyp shyqqan sátte órt odan saıyn údep, elektr symdary jana bastapty. – Meniń ornymda bolǵan kez kelgen azamat balalardy qutqarýǵa umtylar edi. Qınalǵanǵa qol ushyn sozý qanymyzda bar qasıet, tipti, azamattyq paryzymyz bolýy qajet, – deıdi beıbit kúnde óz ómirin qaýip-qaterge tigip, órtten úsh balany qutqarǵan Qýanysh Berdenov. Joldasbek ShО́PEǴUL, «Egemen Qazaqstan». Atyraý oblysy.