Batys Qazaqstanda «Jaqsylyq jasa!» sharasy jalǵasýda

ORAL. 29 aqpan. Batys Qazaqstan oblysynda «Jaqsylyq jasa» sharasy aıasynda jaqynǵa, sondaı-aq, qarttar men jalǵyz basty adamdarǵa kómek kórsetýge baǵyttalǵan birqatar is-sharalar júrgizilýde. Bul týraly inform.kz-ke silteme jasaǵan egemen.kz tilshisi habarlady. Ortalyq kommýnıkasııalar qyzmetiniń Batys Qazaqstan oblystyq fılıalynda ótkizilgen baspasóz máslıhatynda «Qamqor» jastar qoǵamdyq birlestiginiń tóraǵasy Ádilet Berikqalıev osyǵan qatysty birqatar bastamanyń qolǵa alynǵanyn atap ótti. «Sonyń ishinde jas urpaqqa egde jastaǵy adamdardy qadirleý, aınalasyndaǵy jandarǵa meıirimmen qaraýǵa úndeıtin «Oryn ber, sypaıy bol», jalǵyzilikti qarııalarǵa turmysta kómek kórsetýge oraılastyrylǵan «Ardagerlerdi ardaqtaıyq!», eriktilerdiń balalar men qarttar úıine baryp, qaıyrymdylyq kórsetýine, mádenı keshterdi uıymdastyrýǵa baǵyttalǵan sharalardy erekshe aıtyp ótken jón», – dedi Ádilet Berikqalıev. Sondaı-aq, baspasóz máslıhatyna qatysqan oblystyq balalar úıiniń dırektory Raısa Naýryzova aıtyp ótkendeı, sońǵy ýaqytta oblystyq balalar úıine jetkilikti deńgeıde qarjy bólinip, Úkimet barlyq balalardy tolyǵymen óz qamqorlyǵyna alyp otyr. «Negizinen Úkimettiń, bizdiń ujymnyń maqsaty – balalardy úıge jiberý. Balalar júrek jylýlyǵyn sezinip, úı tárbıesin kórip ósse deımiz. 2015 jyly patronattyq tárbıege 38 bala jiberildi. Bıyl azdaý, ázirge tórt balany patronattyq tárbıege ázirlep jatyrmyz. Jalpy 17-18 jastaǵy balalardy patronattyq tárbıege berý qıyndaý. О́sip ketken balalardy eshkim alǵysy kelmeıdi. Balalar úıindegilerdiń jasy – 3-ten 18-ge deıingiler. Olardyń kóbin ózimiz ósirip, mektebin bitirgennen keıin joǵary oqý ornyna túsýine barynsha jaǵdaı jasaımyz», – deıdi balalar úıiniń basshysy. Temir Qusaıyn. Derek, sýret: inform.kz.