Naýryz qutty bolsyn!

Ulysty shattyqqa bólegen ulyq meıram

Keshe Memleket basshysy Nursultan Nazarbaev Astanada Naýryz merekesine qatysty. Elbasy ádettegideı bul kúni sán-saltanaty kelisip, sap túzegen aqshańqan kıiz úıleri kóz tartqan etnoaýyldy aralap kórdi. Árıne, bul kún ónerpaz bitken sándi kıinip, ulttyq naqyshqa malyndy. Aýyldyń aınalasy qyzyl-sary gúlge bólenip, jerdi de jasyl japqan. Astananyń áli de bolsa kóktemge boı aldyra qoımaǵan qara sýyǵy da bul kúni, dál osy etnoaýylda sap tyıylǵandaı. Kún jadyrap, aspanda án qalyqtap, aınalany shattyq kernedi. Elbasy Naýryz toılanyp jatqan etnoaýylda Qazaqstan halqyn Ulystyń uly kúni – Naýryz meıramymen quttyqtady. «Áz-Naýryz barsha halqymyzǵa qutty bol­syn! Osy jerge jınalǵan halyqqa, bar­lyq qazaqstandyqtarǵa shyn júregimmen baq-be­reke tileımin. Osynaý izgi mereke Par­lament saılaýyn ótkizý sharasymen qa­tar keldi. Qazaqstandyqtar bir úıdiń ba­lasyndaı tutastyǵyn kórsetti. Halqymyzdyń osy birligi myzǵymaıtyn bolsyn. Bizdiń jasap jatqanymyzdyń bári qazaqstandyqtardyń keıingi urpaǵyna mura bolyp qalady. Bizdiń bolashaqqa aparatyn jolymyz zor jetistikter men Táýelsizdigimizdiń ıgilikteri arqyly jarqyrap turatyn bolsyn. Barsha tabıǵat jańarǵan Naýryz merekesinde adamdar árdaıym bir-birine degen ókpe-renishin keshirgen, muqtajdarǵa kómektesken, baqyt tilep, aǵash otyrǵyzǵan jáne bulaq kózin ashqan. Halyq bul kúni tilegen tilekter mindetti túrde oryndalatynyn aıtady. Men árbir shańyraqqa baqyt, shattyq shýaǵyn jáne bar jaqsylyqty tileımin», – dedi Qazaqstan Prezıdenti. Merekelik is-shara barysynda konserttik baǵdarlama, teatrlandyrylǵan kórinister, sport saıystary, kolónershiler aýyly men ulttyq salt-dástúrdi tanystyrý sharalary uıymdastyryldy. Taıqazan janynda teatrlandyrylǵan qoıylym kórsetilip, qonaqtarǵa Naýryz kóje usynyldy. Etnoaýyldyń kire berisinde halyq bıi ansambli  «16 qyz» bıin oryndap, ulttyq kıim kıgen qyzdar Shashý shashty. Ortalyq kireberiste Shyǵys bazardyń ınteraktıvti ýchaskesi – qolónershiler  aýyly ornalasty, onda qyshshylar, zergerler, kıiz basý jáne aǵashqa órnek jasaý sheberleri óz eńbekterin usyndy. Sondaı-aq, etnoaýylda eki altybaqan ornatylyp, qyz-jigitter arasynda án-aıtys uıymdastyryldy. Halyq ánderi shyrqaldy. Sonymen qatar, «Tusaýkeser», «Besikke salý», «Syrǵa salý», «Qyz uzatý», «Quda túsý» salt-dástúri kórsetildi jáne «Toǵyzqumalaq», «Oqtaý tartys», «Asyq oınaý» oıyndary oınatylyp, «Qamajaı» bıi bılendi. Dınara BITIKOVA, «Egemen Qazaqstan». Sýretterdi túsirgender S.BONDARENKO, B.OTARBAEV.