«Nur Otan» partııasy Májilis depýtattarynyń 84 mandatyn aldy

ASTANA. 22 naýryz. Búgin Ortalyq saılaý komıssııasynyń kezekti otyrysy ótti. Onda «Altynshy shaqyrylatyn Qazaqstan Respýblıkasy Parlamenti Májilisiniń depýtattaryn kezekten tys saılaýdyń qorytyndylaryn anyqtaý jáne jarııalaý, partııalyq tizimder boıynsha daýys berý qorytyndylaryna qaraı depýtattyq mandattardy bólý týraly» qaýly qabyldandy. Bul týraly egemen.kz tilshisi habarlady. Barlyq oblystardyń jáne Astana men Almaty qalalarynyń aýmaqtyq saılaý komıssııalary usynǵan derekter boıynsha Ortalyq saılaý komıssııasy saılaýdyń sońǵy qorytyndylaryn anyqtady. Soǵan oraı saılaýshylar tizimine engizilgen 9 810 852 azamattyń 7 566 150-i daýys bergeni belgili boldy. Bul barlyq saılaýshynyń 77,12 paıyzyn quraıdy. Olardyń ishinde «Nur Otan» partııasyna – 6 183 757 (82,20 paıyz), Qazaqstan Kommýnıstik halyq partııasyna – 537 123 (7,14 paıyz), Qazaqstannyń «Aq jol» demokratııalyq partııasyna – 540 406 (7,18 paıyz), «Birlik» saıası partııasy – 21 484 (0,29 paıyz), Jalpyulttyq sosıal-demokratııalyq partııaǵa – 88 813 (1,18 paıyz) jáne «Aýyl» halyqtyq-demokratııalyq patrıottyq partııasyna 151 285 (2,01 paıyz) daýys berilgen. Osylaısha, Saılaý týraly zańǵa sáıkes saılaýshylar daýystarynyń 7 jáne odan da kóp paıyzyn alǵan úsh saıası partııa Parlament Májilisi depýtattarynyń mandattaryna ıe boldy. Atap aıtqanda, «Nur Otan», «Aq jol» jáne Qazaqstan Kommýnıstik halyq partııasy Májiliske óz kandıdattaryn usyna alady. «Bul partııalar arasyndaǵy depýtattyq mandattar tómendegideı bólinsin: «Nur Otan» partııasyna – 84, «Aq jol» partııasyna – 7 jáne Qazaqstan Kommýnıstik halyq partııasyna 7 mandat», – dedi Ortalyq saılaý komıssııasynda ótken arnaıy brıfıngte Komıssııa tóraǵasy Qýandyq Turǵanqulov. Sonymen qatar, otyrysta Qazaqstan halqy Assambleıasy saılaıtyn Parlament Májilisiniń depýtattaryn saılaý qorytyndylary da jarııa etildi. Bul rette Assambleıadan Májilis depýtattary bolyp Saýytbek Abdrahmanov – «Egemen Qazaqstan» respýblıkalyq gazeti» AQ prezıdenti, Vladımır Bojko – Qazaqstan Respýblıkasy Ishki ister mınıstriniń orynbasary, Natalıa Jumadildaeva – Qyzylorda qalasyndaǵy oqýshylar men jasóspirimder úıiniń dırektory, Roman Kım – Parlament Májilisi V saılanymynyń depýtaty, Narıne Mıkaelıan – Almatydaǵy armıan etnomádenı birlestiginiń tóraıymy, Ahmet Mýradov – Parlament Májilisi V saılanymynyń depýtaty, Shaımardan Nýrýmov – Respýblıkalyq uıǵyr etnoortalyǵynyń tóraǵasy, Iýrıı Tımoshenko – Parlament Májilisi V saılanymynyń depýtaty jáne Shakır Hahazov – Dúngen etnomádenı ortalyqtary qaýymdastyǵy basqarmasynyń múshesi saılandy. Aıta keteıik, saılaý nátıjesi boıynsha S.Abdrahmanov – 345 (93,50 paıyz), V.Bojko – 349 (94,58 paıyz), N.Jumadildaeva – 343 (92,95 paıyz), R.Kım – 346 (93,77 paıyz), N.Mıkaelıan – 336 (91,06 paıyz), A.Mýradov – 339 (91,87 paıyz), Sh.Nýrýmov – 337 (91,33 paıyz), Iý.Tımoshenko – 341 (92,41 paıyz) jáne Sh.Hahazov 342 (92,68 paıyz) daýys aldy. Qýandyq Turǵanqulov atalǵan qaýlyny qabyldaı otyryp, Ortalyq saılaý komıssııasy elde sońǵy eki aı boıy júrgen saılaý naýqanyn aıaqtaıtynyn atap ótti. «Osylaısha, Qazaqstan Respýblıkasy Ortalyq saılaý komıssııasy Qazaqstan Respýblıkasy Prezıdentiniń Parlament Májilisi depýtattarynyń kezekten tys saılaýyn uıymdastyrý jáne ótkizý týraly Jarlyǵynyń oryndalýyn qamtamasyz etti», –dedi Komıssııa tóraǵasy. Elaman Qońyr. Derek: egemen.kz. Sýret: 24.kz.