AQTО́BE. 21 naýryz. Aqtóbede áleýmettik dúken ashyldy. Onyń ashylý saltanatyna oblys ákimi Berdibek Saparbaev qatysyp, «Nur-Aqtóbe» shaǵyn aýdanynyń turǵyndaryn merekemen quttyqtady. Bul týraly egemen.kz tilshisi habarlady.
Sonymen qatar, oblys ákimi Memleket basshysynyń tapsyrmalaryn oryndaýda óńiraralyq kooperasııa jáne halyqty qol jetimdi baǵadaǵy azyq-túlikpen qamtamasyz etý maqsatynda jergilikti bılik tarapynan atqarylyp jatqan sharalarǵa toqtaldy.
Aqtóbelikter sońǵy eki apta ishinde ońtústik óńirlerdiń qatysýymen uıymdastyrylǵan jármeńkelerge qatysyp, baǵasy arzan azyq-túlikke qol jetkizýde. Qyzylorda jáne Jambyl oblystarynyń aýyl sharýashylyǵy taýarlaryn óndirýshileri kókónis, kúrish. jarma, balyq jáne basqa da ónimderdi naryq qunynan 15-20 paıyz arzan baǵamen satýda.
Osy jyldyń 26 naýryzynda «Qonys» sport saraıynda Ońtústik Qazaqstan oblysy ónim óndirýshileriniń qatysýmen iri jármeńke ótkizý kózdelýde. Sondaı-aq, ońtústik aımaqtaǵy úsh oblystyń taýar óndirýshilerimen suranysqa ıe halyq tutynatyn taýarlary, kıim-keshek, kilemderdi tómen baǵamen satyp alýǵa múmkindik jasaıtyn kórme uıymdastyrylady.
«Aqtóbe» áleýmettik-kásipkerlik korporasııasy ońtústik óńirlerden ákelinetin jáne jergilikti jerden shyǵatyn ónimder oblys ortalyǵyndaǵy 10 kommýnaldyq bazar men saýda núktelerinde satylady. Biz osyndaı saýda núkteleriniń sanyn kóbeıtýdi josparlap otyrmyz. Solardyń biri osy aýdanda búginnen bastap óz jumysyn bastady. «Nur-Aqtóbeni» tańdaýymyz beker emes. Munda memlekettik baǵdarlamamen salynǵan 11 úıde 15 myńǵa jýyq adam turady. Shaǵyn aýdan kólemi áli de keńeıetin bolady», – dep atap ótti oblys ákimi turǵyndar aldynda sóılegen sózinde.
Odan bólek, aımaq basshysy jergilikti bıliktiń halyqqa keshendi qyzmet kórsetetin aýla klýbtary men ortalyqtaryn ashýdy damytý týraly josparlarymen bólisti. Berdibek Saparbaev aýmaǵy 180 sharshy metrdi quraıtyn dúkendi qarap shyǵyp, taýar túrlerimen jáne olardyń baǵalarymen tanysty. Bul jerde «Ramazan» JShS, «Aıs» JShS sekildi jergilikti óndirýshilerdiń ónimderimen qatar kooperasııa aıasynda ońtústik óńirlerden jetkizilgen aýyl sharýashylyǵy ónimderi de molynan usynylýda.
Satybaldy Sáýirbaı.
Derek, sýret: egemen.kz.
