ASTANA. 25 naýryz. Qazaqstan Prezıdenti Nursultan Nazarbaev VI shaqyrylymdaǵy Parlamenttiń birinshi sessııasyna qatysty. Bul týraly akorda.kz-ke silteme jasaǵan egemen.kz tilshisi habarlady.
Memleket basshysy depýtattardy Májilis jumysynyń bastalýymen quttyqtap, ótken saılaýdyń elimiz úshin tarıhı máni bar ekenin aıtty.
«Saılaýdyń nátıjesi qazaqstandyqtardyń qazirgi jáne bolashaq birtutas ult retindegi tutastyq deńgeıi joǵary ekenin naqty kórsetip berdi. Saılaý qazaqstandyq birlikti nyǵaıtqan tarıhı aktige aınaldy. Daýys berý Ult josparyn búkilhalyqtyq qoldaýdyń kórinisi boldy. Men Táýelsizdiktiń 25 jyldyq mereıtoıy jylynda ótken saılaýdyń tarıhı nátıjesimen qazaqstandyqtardy taǵy da quttyqtaımyn. Sondaı-aq, Májilistiń jańa quramyndaǵy barlyq depýtattardy parlamentshi mártebesin alýymen quttyqtaımyn», – dedi Qazaqstan Prezıdenti.
Nursultan Nazarbaev qazaqstandyqtar úshin qoǵam tirshiliginiń birqatar mańyzdy salalarynda jańa múmkindikterge jol ashqan Ult josparyn júzege asyrýdyń aralyq nátıjelerine de egjeı-tegjeıli toqtaldy.
Qazaqstan Prezıdenti altynshy shaqyrylymdaǵy Parlamenttiń zań shyǵarý jumysyna qatysty birqatar mańyzdy mindetterdi atady.
«Birinshiden, barlyq qarjy úderisteriniń jarııalylyǵyn qamtamasyz etetin biryńǵaı salyq jáne keden kodeksin qabyldaý kerek. Ekinshiden, «Jer qoınaýy jáne jer qoınaýyn paıdalaný týraly» kodeksti qabyldaý arqyly osy saladaǵy qatynastardy retteıtin barlyq normalar bir zańda shoǵyrlandyrylady. Úshinshiden, qoldanystaǵy elektr energetıkasy máseleleri jónindegi zańnamaǵa ózgerister engizý qajet. Bul energııa taratýshy uıymdardy irilendirý úderisi úshin kerek. Tórtinshiden, monopolııaǵa qarsy salany reformalaýdyń ekinshi kezeńi aıasynda básekelestik máseleleri jónindegi zańnamalyq aktilerge ózgerister men tolyqtyrýlar engizgen jón. Besinshiden, memlekettik qyzmetterdi básekeli ortaǵa berý salasyndaǵy zańnamany jańǵyrtý kerek», – dedi Nursultan Nazarbaev.
Sonymen qatar Memleket basshysy Májilis depýtattary zań shyǵarý úderisinde Parlament Senatymen aradaǵy syndarly ózara is-qımyl dástúrin jalǵastyratynyna senim bildirdi.
«Májilistiń jalpy ókilettik merzimine arnalǵan zańnamalyq jumystardyń perspektıvalyq josparyn ázirleý mańyzdy mindet bolyp sanalady. Jańa ahýal jaǵdaıynda Parlamenttiń jáne onyń palatalarynyń qoǵamdyq saıası róli men jaýapkershiligi artyp otyrǵanyn aıryqsha aıtqym keledi. Parlamentshilerdiń partııaaralyq ózara is-qımylyn kúsheıtip, barlyq fraksııalar men depýtattyq toptardyń úılesimdi jumysyna qol jetkizý kerek. Qazaqstan depýtattarynyń halyqaralyq parlamentaralyq qoǵamdastyqqa belsene qatysýy da mańyzdy mindet. Jańa depýtattar jumysqa jedel qosylatynyna, al burynǵy quram depýtattary sabaqtastyqty qamtamasyz etip, «jańa arnaǵa» jedel kóshetinine senimdimin», – dedi Qazaqstan Prezıdenti.
Is-shara barysynda Parlamenttiń jańadan saılanǵan depýtattary ant berdi.
Talǵat Raıymbek.
Derek, sýret: akorda.kz.
