Eldi mekenderdegi emdeý mekemeleri

Qaraǵandy oblysyndaǵy Abaı jáne Buqar jyraý aýdan­daryndaǵy eki eldi mekende dárigerlik ambýlatorııa­lar ashyldy. Bul medısınalyq nysandardyń árqaı­sy­synyń qurylysyna 2015 jyly oblys bıýdjetinen  51 mıl­lıon 598 myń teńgeden qarjy bólingen bolatyn. Abaı aýdanyna qarasty Qurma aýylyndaǵy densaýlyq saqtaý beketi  buryn turǵyn úıdiń birin­shi qabatynda ornalasqan edi. Onyń bólmeleri de sanıtarlyq-gıgıenalyq talaptarǵa saı kelmeı­tin. Al Buqar jyraý aýdanyndaǵy Baımyrza aýylynyń dárigerlik nysany burynǵy mýzykalyq mektep ǵımaratynda ornalasyp, qajetti jaǵdaılarsyz jumys istep kelgen bolatyn. Búgingi kúnde jańa ǵımarattar sanıtarlyq standarttardy saqtaı otyryp salynǵan jáne de qa­jetti medısınalyq qural-jabdyqtarmen tolyq qamtamasyz etilgen. Negizinde jańa dáriger­lik ambýlatorııalardyń «350 dá­rigerlik ambýlatorııa, feld­sherlik-akýsherlik beketter jáne emhanalar» jobasy aıasynda sa­lyn­ǵanyn da aıta ketken jón. «Elbasy Nursultan Ábishuly Nazarbaevtyń tapsyrmasyn oryndaı otyryp, jergilikti bılik organdary bizdiń azamattardyń ómir súrý sapasyn arttyrý úshin qajetti jaǵdaıdyń bárin jasaýda.  Bul aıtyp otyrǵan áńgimemizdiń turǵyndardy jaıly baspanamen qamtamasyz etýge, jalpy bilim berý jáne balalar baqshalary júıesin damytýǵa, túrli áleýmettik mańyzy zor ǵıma­rattarǵa, onyń ishinde densaýlyq saqtaý salasyndaǵy nysandarǵa da qatysy bar», – dedi dárigerlik nysandardyń ashylý saltanatynda quttyqtaý sóz sóılegen oblys basshysy Nurmuhambet Ábdibekov. О́ńir basshysy aǵymdaǵy jyly oblysta 27 jańa dárigerlik ambýlatorııany paıdalanýǵa berý josparlanǵanyn atap ótti. So­ny­men qatar, ol kúrdeli jón­deýden keıin oblystyq klınıkalyq aý­rýhananyń  hırýrgııalyq kor­­pý­synyń ashylǵanyn aıtty. Son­daı-aq, memleket-je­ke­men­shik áriptestigi aıasynda dıag­nos­tıkalyq ýltradybystyq zert­teýdiń úsh bólmesi ashylyp, ju­mys isteı bastaǵan. Al Temirtaý qalasynda Maqajanov atyndaǵy klınıkanyń fılıaly qurylyp, paıdalanýǵa berildi. Jalpy, óńir­de densaýlyq saqtaý nysandaryn jóndeý jumystaryna oblys bıýdjetinen 800 mıllıon teńge qarjy bólingen. Qaırat ÁBILDINOV, «Egemen Qazaqstan». Qaraǵandy oblysy.