Inspektor

endi «qolyn maılaı almaıtyn» boldy Ázil-ospaq degenmen, ár ázildiń túbinde shyndyq jatady ǵoı. Ke­zinde ózi avtoınspektor bolyp jumys jasaǵan, zeınetke shyqqan aqsaqal óz izin jalǵastyryp MAI qyz­metkeri bolǵan balasyn tańer­teń­gilik julqylap oıatyp jatyr deıdi. – Áı, tursaıshy, saǵat segizden asyp barady. Shopyrlar tańǵy al­ty-jetiden beri tegin júrip júr, – dep. Sol aıtqandaı, ala taıaqty jol-kólik ınspektoryn kórgende mashına júrgizýshileri sasqalaqtap qalatyndyǵy ras. Ataqty jazýshy Safýan Sháımerdenov «osy jas jigitterge shopyrlar nege ıilip aman­dasady dep renjýshi edim. Ma­shına alyp, bir-eki toqtat­qannan keıin men de olardyń qarasy kó­rin­gende jymıyp, basymdy ıip aman­d­asatyn boldym», dep jazǵany bar. MAI qyzmetkerleri týraly, ásirese, Shymkent ınspektorlary týraly áńgime kóp. Kim qalaı aıtsa da Ońtústiktiń jigitteriniń terisi keń, qanaǵaty bar. Bir jýrnalıst dosymyz Temir­lanǵa asyǵyp bara jatyp, jyl­damdyqty asyryp jiberedi. MAI qyzmetkeri toqtatady. Qaltasyn qarasa aqsha joq. Shynyn aıtady. – Jaraıdy kóke, keıin berersiz, – deıdi ınspektor. Shynynda da, dosymyz kelesi joly Temirlanǵa bara jatyp, álgi ıns­pektordyń nápaqasyn berip ketipti. Endi ondaı kelisimge jol joq. Endi MAI qyzmetkerimen «Shym­kentshe kelisimge» kelýge bol­maı­dy. Jol-kólik polıseıimen sóı­les­seńiz, barlyq áńgime onyń óńi­rindegi beınejetonǵa jazylady. Kamerasy bar beınejeton Shymkent qalalyq jol-kólik ıns­pektorlaryna kezekshilikke shyqqanda beriledi. Sheship alsań tártiptik jazaǵa tartylasyń. Beı­ne­­jeton júrgizýshi men polıseıdiń ara­­syndaǵy bar áreketti jazyp alady. – Jol-kólik polıseıleri týraly el aýzynda alypqashpa áńgime kóp, – deıdi Shymkent qalalyq jer­gil­ikti polısııa qyzmetiniń basshysy Danııar Meıirhan.  Beınejeton polıseılerdiń sy­baılas jemqorlyqqa jol ber­meýine ári qyzmetin taza, ádil at­qarýyna, polısııa qyz­me­tker­leriniń ımıdjin kóterýge múm­kindik beredi. Sonymen qatar, jol-kólik polı­­sııasyn kelisimge kelýge máj­búrleıtin, para usynǵysy kele­tin júrgizýshilerge de sabaq bolady ári olardy tárbıeleıdi. Mundaı áreketke sanaly túrde baryp otyrmyz. Kezekshilikten soń polıseıler beınejetondy bólimge tapsyrady. Al, ondaǵy sóılesýler OQO IID-niń operatıvtik basqarý orta­lyǵy­nyń bazasyna jazylyp aly­­­nyp, birneshe aıǵa saqtaýǵa qoıy­lady. Jetonnyń saqtaý kólemi 32 gıgabaıt, beınejazýy men daýysy joǵary deńgeıde. Jergilikti polısııa qyzmetkerleriniń aıtýy boıyn­sha, jol-kólik erejesin buzǵanǵa baılanysty kúnine 150 protokolǵa deıin toltyrylady. Árıne, jergilikti polısııa qyz­mettiń bul túrin áýeden alǵan joq. Elbasynyń 5 ınstıtýttyq re­formany júzege asyrýdaǵy «100 naq­ty qadam» Ult Josparyn­da jol-kólik polıseıleriniń kezek­shi­lik kezinde beıneregıstratorlarmen jabdyqtalyp, barlyq áreketi qadaǵalanatyndyǵy jó­ninde tapsyrma berilgen bolatyn. Shymkent polısııasynyń qolǵa alyp jatqan sharýasy – Memleket bas­shysynyń tapsyrmasyn júzege asyrý. Bul áreket tek jol-kólik po­lı­­sııa­syna ǵana qatysty emes, tur­ǵyn­darmen qoıan-qoltyq jumys ja­saı­tyn ýchaskelik ınspek­torlar­ǵa da beınejeton beriletin bolady. О́rkenıetti elder úlgisi ozyq elderdiń qataryna kirýdi maqsat etken Qazaqstannyń ár salasynda osylaı kórinis taýyp jatyr. Baqtııar TAIJAN, «Egemen Qazaqstan». Ońtústik Qazaqstan oblysy.