Parıj tórindegi Naýryz

Parıjde Birikken Ulttar Uıymynyń Bilim, ǵylym jáne mádenıet jónindegi uıymynyń (IýNESKO) shtab-páterinde Ázerbaıjan men Aýǵanstannyń, Úndistan men Irannyń, Irak pen Qazaqstannyń, Pákistan men Tájikstannyń, Túrikmenstan men Túrkııanyń Turaqty ókildikteri Halyqaralyq Naýryz kúnine arnalǵan is-shara uıymdastyrdy. IýNESKO Bas dırektorynyń orynbasary Nada ál-Nashıf óz sózinde «Naý­ryzdy mádenı áralýandyq, ózara syılastyq pen úndesýdiń tamasha meıramy», dep aıta kele BUU onyń mańyzyn halyqaralyq meıram retinde jarııalaý jáne IýNESKO-nyń Adamzattyń materıaldyq emes mádenı murasy jónindegi kórneki tizimine engizý arqyly tanyǵanyna nazar aýdardy. Is-sharaǵa jınalǵan qonaqtar – halyqaralyq uıymdardyń, ǵylym men mádenıet jáne óner salalarynyń ókilderi ulttyq taǵamdardan, sonyń ishinde qazaq taǵamynan da dám tatty. Jıyn barysynda Qazaqstan hal­qy­nyń mádenı murasy, óneri jáne dástúri jónindegi baspa ónimderi men ıllıýstrasııalyq materıaldar taratyldy. Uıymdastyrýshylar tarapynan sóz alǵan Iran elshisi Ahmad Djalalı jarqyn meıramǵa arnalǵan saltanattyń IýNESKO tórinde dástúrge aınalǵanyn atap ótti. Aǵymdaǵy jylǵy jeltoqsanda IýNESKO-nyń Materıaldyq emes mádenı murany qorǵaý jónindegi komıteti Ázerbaıjan, Aýǵanstan, Úndistan, Iran, Irak, Qazaqstan, Qyrǵyzstan, Pákis­tan, Tájikstan, Túrikmenstan, Túrkııa jáne О́zbekstan – 12 eldiń atynan jańartylǵan «Naýryz» meıramy atalymyn Adamzattyń kórneki tizimine engizý múmkindigin qaras­tyratyn bolady dep kútilýde. «Egemen-aqparat».