Ismer

«Adam kórki – shúberek» de­gen sózdiń astarynda tereń mán bar. Zamannyń talabyna saı tal­ǵammen kıiný – qazirgi ólshemmen alǵanda tabysqa bastaıtyn al­ǵysharttyń biri. Qaraǵandylyq kásibı tiginshi, talantty konstrýktor-modeler Álfııa Gýmarova osyndaı ustanymǵa júginedi. Álfııanyń anasy da óz isiniń has sheberi. Manzýma Júnisova oblys ortalyǵyndaǵy tigin sehynda eńbek etti. О́tken ǵasyrdyń 70-shi jyldary bul sehtyń aýma­ǵy atshaptyrymdaı bolýshy edi. Bir mezgilde quramynda 6-7 tiginshiden bar 5-7 brıgada qatar jumys isteıtin. Ol kezde sheteldik kıimge ekiniń biri qoly jete bermeýshi edi. Sondyqtan da jurt kıimniń barlyq túrine tapsyrys berip jatatyn. Álfııa bes jasqa tolǵanynda anasy Almatyǵa baryp, modeler mamandyǵy boıynsha bilim aldy. Odan keıin Rıgaǵa attanyp, ol jaqta pishýshi-modeler kýrsynda oqydy. Bir sózben aıtqanda, óz isine shyn berilgen eńbekqor jan izdenýden bir tanbady. Anasynyń janynda júrip Álfııa da kórgenin kókeıine túıe berdi. Sol kezdiń ózinde talapty qyz qýyrshaqtaryna arnap kıimdi ózi tigip alatyn. Álfııa 10-shy synyp oqyp júrgeninde ózine arnap sándi kıim­derdi tige bastady. Bireýdiń ústinen ózine unaǵan kıimdi kóre qalsa boldy, úıge kele sala sony aınytpaı piship, tigip ala qoıatyn. «Ana kórgen ton pisher» degen osy ǵoı! Orta mektepti aıaqtaǵan soń, Taýly Altaı tehnologııalyq teh­nıkýmyna tústi. Oqýyn bitir­gennen keıin anasy jumys isteı­tin «Saryarqa» fırmasynda eńbek jolyn bastady. Toqsanynshy jyldardaǵy toqy­raýda tigin sehy jabyldy da, óń­keı sheber tiginshiler jan-jaqqa tarap ketti. Amal joq, Álfııa da úıde otyryp, kıim tigýge májbúr boldy. Birde ol dúńgirshekten «Býr­da» sán jýrnalyn kezdeısoq kórip qaldy. Álfııa osy jýrnaldy qolynan tastamaı, ózdiginen talmaı úırenip, talaı sándi dúnıelerdi ómirge ákeldi. Sóıtip júrgeninde Saıat Dosybaev degen telejýrnalıstiń «Moda eks­klıýzıv» degen avtorlyq baǵdar­lamasyna shaqyrtý aldy. Munda Álfııa efırde Enna Býrda júıesi boıynsha kıim pishý kýrsyn júrgizetin boldy. Bir qyzyǵy, televızııalyq shaǵyn sheberhana Álfııanyń úıinen oryn alǵan edi. Bul kez erkin shyǵarmashylyqqa esik aıqara ashylǵan jyldar boldy. Jalpy, joba úsh jyldaı jemisti jumys istedi. Osy ýaqyt ishinde talaı jas tiginshi, daryndy pishýshiler ómirge joldama alyp, kásibı maman retinde qalyptasty. Televızııalyq jobadan keıin Álfııa da óz aldyna jeke kásip ashyp, jumys isteı bastady. О́zi­niń shaǵyn ǵana ujymymen kúni búginge deıin kıim tigip, sándi kıingisi kelgen jerlesterin tamasha dúnıelermen qýantyp keledi. Álfııany ulaǵatty ustaz dep te bek senimmen aıtýǵa bolady. Ol óz sheberhanasynda sándik pishý sabaqtaryn ótkizedi. О́ńirdiń ár tarabynan ondaǵan qyz-kelinshekter kelip, sheberdiń qalyptasqan nusqaýlyǵy boıynsha tigin isiniń qyr-syryna qanyǵady. Bul jerden oqyp-úırenip, tálim-tárbıe alǵan jas tiginshilerdiń kóbisi qazirgi ýaqytta óz aldyna is bastap, jerlesterin sándi kıimdermen qamtamasyz etip júr. Álfııa otbasynda da úlgili ana. Otaǵasy ekeýi úsh uldy tárbıelep ósirgen. Búgingi kúnde Álfııany kásibı turǵyda mazalaıtyn másele az emes. Sonyń biri týraly ol by­laısha oı tolǵaıdy. «Qazir Qara­ǵandyda qoly altyn myqty ti­ginshiler kóp, – deıdi Álfııa. – Osy sheberlerdiń basyn qosyp, ortaq iske jumyldyrsa ǵoı. О́kinishke qaraı, qaraǵandylyq tiginshiler kúnkóris qamy úshin Astanaǵa baryp jumys isteý­ge májbúr... Al Qaraǵan­dyǵa Túrkııa men Bishkekten arzan taýarlar áli aǵylyp kelip jatyr...». Álfııa Gýmarovanyń tigin sala­synda júrgeniniń ózine de qy­ryq jyl bolypty. О́z isin kásibı tur­ǵy­da ábden meńgergen konstrýktor-modelerge beri­le­tin tapsyrys ta áralýan. Keńse kıimi, keshki jáne úılený toıynyń kóılekteri, pal­tolar men tondar, djınsy, bı kıim­deri deısiń be, osynyń bári de Ál­fııanyń sheberhanasynan tuty­ný­shylaryna tikeleı jol tartyp jatady. Tap­syrys bergender buıym­nyń sapa­syna qarap tańdaı qaqsa, al olar­dyń kóńilderinen shyǵý degen Álfııa jáne onyń komanda­syna da zor mereı. Qazirgi tańda Astana men Alma­tydan da talǵamy joǵary jan­dar tara­pynan tapsyrys túse bas­taǵan. Bul endi kásibı sheber­likti moıyndaý degen sóz! Qaırat ÁBILDINOV, «Egemen Qazaqstan». QARAǴANDY. Sýretti túsirgen Lınar GALIMOV.