Oral qalasynyń ákimi taǵaıyndaldy

ORAL. 5 sáýir. Prezıdent Ákimshiliginiń kelisimimen jáne Batys Qazaqstan oblysy ákimi Altaı Kólginovtiń ókimimen Narıman Tóreǵalıev Oral qalasynyń ákimi bolyp taǵaıyndaldy. Bul týraly zhaikpress.kz-ke silteme jasaǵan egemen.kz tilshisi habarlady. Narıman Tóreǵalıuly 1964 jyly burynǵy Taıpaq aýdany Esensaı aýylynda týǵan. Bilimi joǵary, 1990 jyly Jambyl gıdromelıoratıvtik-qurylys ınstıtýtyn – ınjener-ekonomıst, 2004 jyly Kaspıı qoǵamdyq ýnıversıtetin zańger mamandyǵy boıynsha bitirgen. Eńbek jolyn 1981 jyly «Esensaı» keńsharynda jumysshy bolyp bastaǵan ol 1982-1984 jyldary Keńes áskeri qatarynda Vengrııada áskerı boryshyn ótedi. Eńbek jolynda Terekti aýdandyq eńbek jáne halyqty áleýmettik qorǵaý bóliminiń bastyǵy, Oral qalasyndaǵy jalpy úlgidegi ınternat úıiniń dırektory, oblystyq jumyspen qamtý jáne áleýmettik baǵdarlamalardy úılestirý basqarmasy bastyǵynyń orynbasary, oblystyq jumyspen qamtý jáne áleýmettik baǵdarlamalardy úılestirý departamenti dırektorynyń orynbasary syndy jaýapty qyzmetterdi atqardy. Sondaı-aq, 2008-2010 jyldary Tabıǵı monopolııalardy retteý agenttigi Batys Qazaqstan oblystyq departamentiniń dırektory boldy. Al 2010-2012 jyldary oblystyq jumyspen qamtý jáne áleýmettik baǵdarlamalardy úılestirý basqarmasynyń bastyǵy. Sonymen qatar, Narıman Tóreǵalıev 2012-2015 jyldar aralyǵynda Aqjaıyq aýdanynyń ákimi boldy. Al 2015 jyldyń 12-maýsymynan búginge deıin oblys ákiminiń orynbasary bolyp qyzmet atqardy. Temir Qusaıyn. Derek, sýret: zhaikpress.kz.