ASTANA. 5 sáýir. Búgin Qazaqstan Respýblıkasy Ulttyq mýzeıinde «О́tken kúngi beınelerdiń búgingi kórinisi» kórmesiniń tusaýkeseri ótti. Bul týraly egemen.kz tilshisi habarlady.
Kórmede qalpyna keltirilgen jádigerlerdi alǵashqy bolyp tamashalaǵandardyń arasynda «Qaısar» sport klýbynyń arbaly sportshylary, elimizdiń paralımpııalyq quramasynyń músheleri de boldy. Bul shara «Nur Otan» partııasy – «Birlik» Astana qalalyq fılıalynyń «Mádenıet» bastaýysh partııa uıymynyń qoldaýymen uıymdastyryldy.
Kóne eskertkishter men esponattardan alǵan áser týraly arbamen bıleý jáne ústel tennısi komandalarynyń múshesi Ábýov Qurmanáli bólisti.
«Men Ulttyq mýzeıge birinshi ret kelip otyrmyn. Halqymyzdyń, Qazaq handyǵynyń tarıhy týraly kóbirek aqparat alǵanymnan keremet áser aldym. Biregeı tarıhı eskertkishterdi alǵash ret óz kózimmen kórdim. Kórgen nárselerdiń barlyǵy da men úshin úlken jańalyq boldy», dedi Qurbanáli Ábýov.
Sonymen qatar, ol qazaqstandyq arheologtar men qaıta qalpyna keltirýshi ǵalymdardyń qazaq halqynyń tarıhyn zertteý jáne nasıhattaýdaǵy eren eńbekteri úshin alǵysyn bildirdi. «Ǵalym arheolog, restavratorlarǵa óz tabystaryn jasyryp qoımaı, halyq kórsin degen nıetpen mýzeıge tapsyryp jatqandary úshin rahmet aıtamyn. Olardyń eńbekteriniń arqasynda biz babalarymyzdyń ertede qalaı ómir súrgendigi týraly, qandaı buıymdardy qoldanǵandyǵy jóninde aqparat aldyq. Osy tarıhı qundylyqtarymyzdy urpaqtan urpaqqa jetkizý mańyzdy sharýa ekenin eskerýimiz qajet», dedi ol.
Dastan Kenjalın.
Derek, foto: Mádenıet jáne sport mınıstrligi.
