AQSh-tyń «The Hill» gazeti Elbasynyń maqalasyn jarııalady

ASTANA. 6 sáýir.  Memleket basshysy Nursultan Nazarbaevtyń «Iаdrolyq qaýipsizdik jónindegi sammıt: ilgeri bastaǵan jol»  maqalasy AQSh-tyń The Hill atty gazetinde jarııalandy. Bul týraly akorda.kz habarlady. Maqalada Elbasy sammıt kezinde ótken kezdesýler qaýipti ıadrolyq materıaldar aınalymyn baqylaý máselesindegi yntymaqtastyqty jańa deńgeıge kóteretinin, al AQSh prezıdenti Barak Obamanyń sammıtti ótkizýdegi roli ıadrolyq qaýipsizdikti nyǵaıtý isine naqty úles qosqanyn atap ótti. «Degenmen, sammıtter serııasynyń qorytyndysyn shyǵara otyryp, halyqaralyq qoǵamdastyq ıadrolyq qater azaımaǵanyn, kerisinshe ulǵaıyp bara jatqanyn moıyndaýy tıis. Transulttyq terrorlyq uıymdardyń ósip-jetilýi jáne óńirlik qaqtyǵystar eskerýge tıis jańa problemalardy týdyrýda», – delingen maqalada. Sonymen birge Memleket basshysy Keńes odaǵynan kólemi jóninen álemdegi tórtinshi ıadrolyq arsenalǵa ıe bolyp qalǵan Qazaqstannyń tájirıbesin eske salyp, bizdiń halyqtyń ıadrolyq qarý synaý úshin polıgon retinde paıdalanylǵan, 500 ıadrolyq synaqtyń kesirinen bir jarym mıllıonnan astam azamaty men aýqymdy terrıtorııasy radıasııaǵa ushyraǵan elde turǵanyn,   osynyń ózi qaýipsizdikti basqasha túsinýge septigin tıgizgenin aıtty. Qazaqstan Prezıdenti halyqtyń qoldaýy arqasynda keńestik Semeı ıadrolyq polıgony jabylǵanyn, sodan keıin elimiz óz aýmaǵyndaǵy barlyq ıadrolyq qarýdan bas tartqanyn, sonyń nátıjesinde  Ortalyq Azııada elderdiń bir-birine degen senimi artqanyn atap ótti. «Iаdrolyq qarý budan bylaı Ortalyq Azııada ulttyq qaýipsizdikti qamtamasyz etý faktory bolyp sanalmaıdy», – dedi Nursultan Nazarbaev. Maqalada Memleket basshysy elimizdiń ıadrolyq qarýdan bas tartýy osy máseleni barynsha keńinen talqylaýǵa áser etetinin, ol Irannyń AQSh, Reseı, Qytaı, Ulybrıtanııa, Fransııa jáne Germanııamen ıadrolyq problema boıynsha kelisim ázirleý jónindegi bastapqy kelissózderine septigin tıgizgenine nazar aýdardy. Osyǵan baılanysty Qazaqstan Prezıdenti búkil álemde ýrandy baıytý isiniń alańdaýshylyq týǵyzyp otyrǵanyn, ýrandy baıytýdy toqtatý úshin Qazaqstandaǵy Atom energııasynyń halyqaralyq agenttigi tarapynan tómen baıytylǵan ýrannyń álemdegi tuńǵysh banki qurylyp jatqanyn, ol ıadrolyq otyndy kez kelgen elge jetkizýdi senimdi túrde qamtamasyz etip, sol arqyly  baıytýǵa arnalǵan baǵasy qymbat turatyn jáne turaqsyzdandyratyn qondyrǵylardy ázirleý men  jasaýǵa degen qajettilikti joıatynyn eskertti. Nursultan Nazarbaev ıadrolyq synaqtardyń barlyǵyna tyıym salý qajettigin taǵy da atap aıtty. «Birikken Ulttar Uıymy 29 tamyzdy, Semeı polıgony jabylǵan kúndi Iаdrolyq synaqtarǵa qarsy kúrestiń halyqaralyq kúni dep jarııalady. Qazaqstandaǵy ıadrolyq synaqtardyń aýyr saldarlary jáne Iаdrolyq synaqtarǵa jappaı tyıym salý týraly sharttyń (IаSJTSh) tezirek kúshine ený qajettigi týraly biz bastamashylyq etken ATOM jobasynda halyqaralyq deńgeıde aıtylǵan, onyń ıdeıalaryna 100-den astam eldiń qarapaıym turǵyndary qoldaý kórsetti», delingen maqalada. Japonııamen birge IаSJTSh jónindegi sholý konferensııasynyń teń tóraǵasy retinde Qazaqstan osy másele boıynsha jumys júrgizýge nıetti. Nursultan Nazarbaev barlyq memleketterdi, ásirese IаSJTSh-nyń kúshine enýine yqpal etetin elderdi jaýapkershilik tanytyp, tıisti qadamdar jasaýǵa shaqyrdy. «Synaqtarǵa tyıym salý barlyq máseleni ózinen ózi sheshpeıdi. Biraq kelisimniń kúshine enýi bizdiń álemdegi ıadrolyq qarýdy joıý jónindegi túpkilikti maqsat jolyndaǵy taǵy bir eleýli qadam bolmaq»,  dep túıindedi Memleket basshysy. Dastan Kenjalın. Derek, foto: akorda.kz