ASTANA. 6 sáýir. Búgin tún aýa fýtboldan ÝEFA Chempıondar lıgasynyń shırek fınaly bastaldy. «Barselona» óz alańynda Madrıdtiń «Atletıko» komandasymen kezdesti. Ekinshi oıyn Mıýnhende «Bavarııa» men «Benfıka» klýbtarynyń arasynda ótti. Bul týraly egemen.kz tilshisi habarlady.
«Barselona» (Barselona, Ispanııa) – «Atletıko» (Madrıd, Ispanııa) 2:1 (1:0)
Bul matchta Ispanııada chempıondyq ataqqa talasyp jatqan komandalar kezdesti. Qazir el chempıonatynda katalondyq klýb 76 upaımen birinshi orynda kele jatsa, Madrıdtiń komandasy 70 upaımen «Barselonanyń» ókshesin basyp kele jatyr. Sondyqtan ekeýiniń arasyndaǵy oıyn chempıonattaǵydaı qyzyqty jáne tartysty ótti.
Kezdesýde birinshi goldy 25 mınýtta qonaqtar soqty. Bul doptyń avtory Fernando Torres atandy. Osydan keıin jarty saǵat bir-birin ańdysqan komandalardyń naǵyz keskilesken shaıqasy bastaldy. Alań ıeleri de qonaqtar da qaqpaǵa qaýipti jaǵdaı jasap qoımaı, oıyn erejesin de buzyp jatty. Matchta alǵashqy sary qaǵazdy Torres aldy. Odan keıin ol taǵy eskertý alyp, birinshi taım bitpeı jatyp alańnan qýyldy. Osy kúni «Atletıkonyń» oıynshylary 7 sary qaǵaz ben bir qyzyl qaǵaz aldy. Sóıtip, matchtyń 35 mınýtynda qonaqtar alańda on adammen qaldy. Alań ıeleri úsh eskertýmen shekteldi.
Matchtyń ekinshi jartysynda «Barselona» shabýyldardy jıeletip, aqyr sońynda eki dop soǵyp, jeńiske jetti. Goldardy alań ıeleriniń ýrýgvaılyq legıoneri Lýıs Sýares soqty.
ÝEFA Chempıondar lıgasy 1/4 fınalyndaǵy qarsylastardyń birinshi matchtary.
5 sáýir. Barselona. «Kamp Noý » stadıony.
Tóreshi: Bryh Felıks
«Barselona»:Ter Shtegen, Pıke, Alves, Maskerano, Alba, Rakıtıch (Rafınıa 64’), Serhıo (Roberto 80’), Inesta (Arda 83’), Sýares, Messı, Neımar.
«Atletıko Madrıd»: Oblak, Godın, Lýıs, Lýkas, Hýanfran, Koke, Gabı, Nıges (Korrea 90’), Grızmann (Tomas 76’), Torres, Ferreıra-Karrasko (Aýgýsto 53’)
Goldar: Fernando Torres, 25 – 0:1, Lýıs Sýares, 63 – 1:1, Lýıs Sýares, 74 – 2:1
Alańnan qýyldy: Fernando Torres, 35 (ekinshi eskertý)
«Bavarııa» (Mıýnhen, Germanııa) – «Benfıka» (Lıssabon, Portýgalııa) 1:0 (1:0)
Bul kezdesýde alań ıeleri jyldam soǵylǵan goldyń arqasynda jeńiske jetti. Áıtpese, qos komandanyń kókmaısa alańdaǵy oıyny teń jaǵdaıda ótti. Oıynnyń 2 mınýtynda «Bavarııanyń» óz alańynan bastalǵan shabýyly qarsylastarynyń aıyp dop alańynan bir-aq shyqty. Osy jerde Rıberı, Levandovskı men Bernat «nemis mashınasyna» tán aldyna kelgen qarsylastarynyń barlyǵyn japyryp, ádemi uıymdastyrǵan shabýylynyń nátıjesinde «Bavarııanyń» chılılik legıoneri Artýro Vıdal gol soqty. Bul alań ıeleriniń bıylǵy maýsymdaǵy eń tez soqqan goly boldy.
Osydan keıin «Benfıka» esepti teńestirýge qanshama ret árekettengenimen oıyn alań ıeleriniń paıdasyna sheshilip aıaqtaldy. Jalpy, kezdesýde komandalar qaqpaǵa qaýipti jaǵdaılar jasap, jankúıerler kútken jaqsy oıyn órnegin kórsetti.
5 sáýir. Mıýnhen. « Allıans Arena » stadıony.
Tóreshi: Marsınıak Shımon.
«Bavarııa»: Noıer, Lam, Kımmıh (Martınes 60’), Alaba, Bernat, Vıdal, Mıýller (Gıotse 85’), Alkantara, Kosta (Koman 70’), Rıberı, Levandovskı
«Benfıka»: Ederson, Almeıda, Lındelef, Jardel, Elızeý, Pıssı (Samarıs 90’), Feısa, Sanches, Gaıtan, Jonas, (Salvıo 83’), Mıtroglý (Hımenes 70’)
Gol: Vıdal 2’
Dastan Kenjalın.
Derek, foto: eurosport, euro-football.ru
Vıdeo: vkontakte áleýmettik jelisi.
