Soltústik Qazaqstanda tasqyn sý qaýpi seıiler emes

PETROPAVL. 7 sáýir. Oblystyq ákimdikte aımaq basshysy Erik Sultanovtyń basshylyǵymen jedel shtabtyń kezekti otyrysy bolyp ótti. Onda turǵyn úılerdi sý basý boıynsha aǵymdaǵy jaǵdaı, tasqynǵa qarsy is-sharalar barysy jáne zardap shekken otbasylarǵa shyǵyndy óteý máseleleri qaraldy. Bul týraly ákimdiktiń baspasóz qyzmetine silteme jasaǵan egemen.kz tilshisi habarlady. Búginde oblys aýdandarynda ondaǵan eldi mekenderdi qarǵyn sý basyp, 6 aýyldyń turǵyndary qaýipsiz jerlerge shyǵarylǵan. Doneskoe aýylynda ólgen maldyń qunyn baǵalaý boıynsha komıssııa óz jumysyn aıaqtady. Tasqyn sýdan zardap shekken 12 úı-jaıdyń ıeleriniń eseptik shottaryna aqshalaı ótemaqy aýdarylatyn boldy.Turǵyn úıler, qurylystar men joldarǵa keltirilgen materıaldyq shyǵyndar eseptelýde. Aımaqta tótenshe jaǵdaılar saldarlaryn joıý úshin 300 mılllıon teńge qarastyrylǵan. Qajettilik týyndaǵan jaǵdaıda Úkimeti qorynan qosymsha aqshalaı qarajat bólinetin bolady. Ishki ister mınıstrligi Tótenshe jaǵdaılarjónindegi komıtettiń qosymsha kúshteri, onyń ishinde jeke quramnyń 123 adamy, 25 tehnıkasy kómek berýde. Tutastaı alǵanda, qutqarý jumystaryna jeke qurylymdardan 700 adam, 196 tehnıka birligi, 10 júzý quraldary, 33 motopompa jumyldyrylǵan. Desek te, tasqyn qaýpi seıiler emes. Taıynsha aýdanda tótenshe jaǵdaı jarııalanyp, Krasnaıa Polıana aýylynda-21, Kellerovkada- 20, Dobrojanovkada- 24 úıdi sý shaıǵany belgili boldy. О́mir Esqalı. Derek, foto: Soltústik Qazaqstan oblysy ákimdiginiń baspasóz qyzmeti.