Jaǵdaı turaqtanyp keledi

Gazetimizdiń 1 sáýir kúngi sanynda «Baıanaýyldyń aýyldary taǵy da sý astynda qalmaq pa?» degen syn maqala jarııalanǵan-dy. 2 sáýir kúni jańa taǵaıyndalǵan oblys ákimi Bolat Baqaýov Baıan­aýyl aýdanyna jumys saparymen baryp qaıtty. Sapar barysynda oblys ákimi biz maqalada jaz­ǵandaı, Qaraashy, Teńdik aýyl­darynyń sý tasqynyna qarsy jasap jatqan daıyndyqtaryn tek­serdi. Oblys ákiminiń baspasóz qyzmetiniń habaryna qaraǵanda, óńir basshysy Teńdik aýyly janyndaǵy biz gazetimizge sýretimen jarııalaǵan kópirdiń de jaǵdaıyn óz kózimen kórip qarap shyqty. О́tken jyly kópirdiń Ashysý ózeni ústine salynǵan tiregi aǵyn sýǵa shydas bermegen edi. Sonyń saldarynan aýylda tótenshe jaǵdaı qalyptasyp, alty turǵyn úı, tórt sharýashylyq qurylysy sýǵa ketip, 99 turǵyn jáne 162 bas mal kóshirilgen bolatyn. Bıyl naýryzdyń sońynda Qaraashy aýylynyń mańynda aınala bóget salyndy. Qazir qar ketken aımaq 70 paıyzdy quraıdy, qar taý­ly jotalarda ǵana qaldy. Osyǵan baılanysty qorǵanysh topyraqty 800 metrge deıin uzartýǵa sheshim qabyldanǵan bolatyn. Sý tasqyny jaǵdaıy únemi baqylaý, Baıanaýyl aýdany boıynsha táýlik boıy baqylaý júr­gizilip, tótenshe jaǵdaı qyzmetteri qaýipke qarsy saqadaı-saı tur. Jumys saparynyń qory­tyndysy boıynsha, oblys ákimi Bolat Baqaýov apatty jaǵdaıdy bol­dyrmaý úshin Baıanaýyl aý­danynyń basshylyǵy men oblys­tyń tótenshe jaǵdaı qyzmetterine Qaraǵandy oblysynyń tótenshe jaǵdaı departamentimen baılanys ornatý jóninde naqty tapsyrmalar berdi. Farıda BYQAI, «Egemen Qazaqstan». Pavlodar oblysy.