Eske alý sharasyna qatysty

Astanada 1995 jylǵy 7 sáýirde tájik-aýǵan shekarasynda jaýyngerlik boryshyn óteý kezinde qaza tapqan Qazaqstan Res­pýblıkasy Ishki áskeriniń jaýyngerlerin eske alýǵa arnal­ǵan shara boldy, dep habarlady Senattyń baspasóz qyzmeti. Oǵan elimizdiń Ishki ister mınıstrligi men Ulttyq ulannyń basshylary, Parlament depýtattary, qoǵam qaıratkerleri, shetelderdiń áskerı attasheleri, áskerı jáne jergilikti soǵys ardagerleri men kadetter qatysty. Sharada sóz alǵan Senat Tóraǵasynyń orynbasary Sergeı Gromov: «Dostastyqtyń ońtústik shepterin qorǵap, qaza tapqan qazaqstandyq áskerler bizge erjúrektik pen áskerı antqa adaldyqtyń ónegesi boldy», – dedi. «TMD-nyń Ujymdyq bitim- gershilik kúshteriniń quramynda Qazaqstannyń Tájikstanda bolýy Ortalyq Azııa aımaǵyn turaqtandyrýda mańyzdy másele boldy, – dedi ári qaraı Senat Tóraǵasynyń orynbasary. – Qazaqstannyń áskerı bólimsheleri qarýly qaqtyǵystardyń órshýine ári soǵys qımyldarynyń kórshi elderge taralmaýyna jol bermes­ten, alǵa qoıylǵan jaýyngerlik mindetterin tabysty oryndap shyqty». S.Gromov tarıhtyń qaıǵyly sabaqtaryn umytpaýǵa jáne qazirgi zamandaǵy qaterlerge qarsy turýǵa ázir bolýǵa shaqyrdy. Armııa men áleýetti qurylymdar qazirgi kezdegi áskerı jáne terrorıstik qaýipterdiń aldyn alý men boldyrmaýda mańyzdy ról atqarýy tıis. Sharaǵa qatysýshylar Taǵzym alleıasyndaǵy eskertkishke gúl shoqtaryn qoıdy. Qaza tapqan áskerlerdiń qurmetine Ulttyq ulannyń astanalyq garnızonynyń quramy saltanatty túrde sappen ótti.