Mamyr aıynda Dzıýdo akademııasy paıdalanýǵa beriledi

ASTANA. 8 sáýir. Mamyr aıynda Almaty qalasynda salynyp jatqan Dzıýdo akademııasy paıdalanýǵa berý josparlanyp otyr. Bul týraly Dzıýdo federasııasynyń baspasóz qyzmetine silteme jasaǵan egemen.kz tilshisi habarlady. Jańa dzıýdo akademııasy barlyq halyqaralyq talaptarǵa saı bolady. Sport kesheninde 4 tatamıge arnalǵan zal, trenajer zaly, 100 adamǵa arnalǵan jataqhana men ashana ornalasady. Onyń ishinde Qazaqstan ulttyq quramasynyń ǵana sportshylary emes, osy sportqa endi qyzyǵýshylyq tanytqan jetkinshekter de jattyǵady. Sonymen qatar, akademııada oqý-jattyǵýlar, sheteldik mamandardyń qatysýymen semınarlar men sheberlik sabaqtaryn uıymdastyrý kózdelgen. Dzıýdo akademııasy Almaty qalasynda salynyp jatyr. Akademııanyń saltanatty túrde ashylý rásimi 13 - 15 mamyr aralyǵynda ótedi. Osy kezde «Grand Prix» jarysyn ótkizý josparlanǵan. Sharaǵa Mádenıet jáne sport mınıstri Arystanbek Muhamedıuly, Almaty qalasynyń ákimi Baýyrjan Baıbek, Halyqaralyq dzıýdo federasııasynyń prezıdenti Marıýs Vızer men Qazaqstan dzıýdo federasııasynyń prezıdenti Keńes Raqyshev qatysady dep kútilýde. «Saltanatty ashylý rásiminiń ótetin kúni men ýaqytyn qosymsha habarlaımyz», delingen Dzıýdo federasııasynyń baspasóz qyzmetiniń habarlamasynda. Dastan Kenjalın. Derek: Dzıýdo federasııasynyń baspasóz qyzmeti. Foto: egemen.kz