Aqyn Oljas Súleımenov ýnıversıtettiń «Qurmetti doktory» atandy

ASTANA. 9 sáýir. Aqyn, qoǵam qaıratkeri, «Mádenıet» qorynyń prezıdenti Oljas Súleımenovke Túrkııanyń Erzýrým qalasyndaǵy Atatúrik ýnıversıtetiniń «Qurmetti doktory» ataǵy berildi. Bul týraly 24.kz-ke silteme jasaǵan egemen.kz tilshisi habarlady. Aqynǵa bul ataq Qazaqstan men Túrkııanyń mádenıetaralyq dıaloginiń damýyna, halyqtar arasyndaǵy dostyqtyń kúsheıýi men túrkologııa salasyna sińirgen aıryqsha eńbegi úshin berildi. Sondaı-aq, saltanatty shara Oljas Súleımenovtyń 80 jyldyq mereıtoıyna oraılastyryldy. Jıynǵa Qazaqstannyń Túrkııadaǵy elshisi Janseıit Túımebaev, TÚRKSOI halyqaralyq uıymynyń bas hatshysy Dúısen Qaseıinov, Erzýrým gýbernatory Ahmet Altyparmaq pen Túrkııanyń qoǵam jáne mádenıet qaıratkerleri qatysty. Búginde Túrkııanyń eń iri joǵary oqý oryndarynyń biri sanalatyn Atatúrik ýnıversıtetinde 72 myńǵa jýyq stýdent 23 fakýltette bilim alady. Mereıtoıǵa qatysqan stýdentter keshtiń qyzyqty ótkenin, aqynnyń óleńderin súıip oqıtynyn aıtty. «Oljas Súleımenov Qazaqstan men Orta Azııa elderinde ǵana emes, Túrkııada da tanymal. Biz jastaıymyzdan aqynnyń shyǵarmalaryn oqyp, rýhanı qazynasynan sýsyndap óstik. Mine, qaıratkermen júzdesý baqytyna da ıe bolyp, qýanyp jatyrmyz», – dedi ýnıversıtet stýdenti Volkan Ieshılaı. Sondaı-aq, Oljas Súleımenov Túrkııa premer-mınıstriniń birinshi orynbasary Tuǵryl Túrkeshpen kezdesti. Basqosýda qoǵam qaıratkeri adamzat órkenıetine túrki halyqtarynyń qosqan úlesi jaıly oı qozǵap, «Nevada-Semeı» qozǵalysynyń 25 jyldyǵyna oraı shyǵarylǵan, mereıtoılyq tósbelgini tabystady. Al TÚRKSOI halyqaralyq uıymynda aqynnyń túrkitildes halyqtardyń tiline aýdarylǵan óleń jınaǵy kópshilikke tanystyryldy. Shara sońynda Oljas Súleımenov: «Jastarmen kezdesip, erekshe shabyt aldym. Bári shetinen bilimdi, alǵyr. Bizdegi qatarlastarymen salystyryp, ortaq uqsastyqtary kóp ekenin ańǵardym. Mundaǵy meniń dostarym, onyń ishinde kópke belgili zııaly qaýym ókilderi aldaǵy mereıtoıyma oraı birneshe jıyn ótkizip, tosynsyı jasady. Jıylǵan kópshilik maǵan degen aq tilekterin jaýdyrdy», – dedi. Talǵat Raıymbek. Derek: 24.kz. Foto: Kazakh.ru.