Jekeshelendirilgen №1 avtopark qalalyq ákimdikke qaıtarylady

21 sáýir kúngi «Egemende» «Keńesip pishpegen ton kelte bolar...» degen syn maqala jarııalandy. Onda: «Oblys ortalyǵynyń kóshelerinen jańadan paıdalanýǵa berildi degen 36 avtobýs baǵyttardan alynyp tastaldy. О́tken jyldyń jeltoqsan aıynda oblys or­ta­lyǵyndaǵy №1 avtobýs parki JShS jekeshelendirildi. 2015 jyly jaz aılarynda «Pavlodar qalasyndaǵy qoǵamdyq kólik qozǵalysy keshenin jańǵyrtý» maqsatynda Almaty kólik jáne kommýnıkasııa ǵylymı-zertteý ınstıtýtynyń mamandary kelip, jobany qolǵa alady. Almatylyq ǵalymdardyń to­lyq, durys zertteý júrgizbe­ge­nine, olardyń jasaǵan negizsiz ońtaılandyrý júıesine qazir halyq narazy. Ákimderdiń tapsyrystaryn oryndap, olardy tyńdap asyǵys jumys júr­gizdi. Qoǵamdyq kóliktermen qara­paıym halyq júretindikten ońtaı­lan­dyrý máselesi birinshi, qala turǵyndarymen talqylanǵan joq. Marshrýttyq júıeni ońtaılandyrý sharalaryn júrgizip, jobasyn jasaǵandary úshin almatylyq ǵalymdarǵa 50-60 mıllıondaı qara­jat jumsalǵan kórinedi. Ǵa­lymdar kelip, aldymen qala tur­ǵyndarymen aqyldasyp baryp, qoǵamdyq tyńdaýlar júrgizilýi qajet bolatyn. Pavlodar Al­maty sııaqty úlken megapolıs emes. Avtobýstarmen, shaǵyn avto­býs­tarmen ǵana júretin qala tur­ǵyn­dary qazir ári-sári kúıde. Ha­lyq ábden úırenip qalǵan, jolaýshylardy tasymaldaıtyn shaǵyn avtobýstardyń baǵyttary ózgerdi. Kún aıazda aıaldama mańynda jańa avto­býstardy saǵattap kútýge máj­­búr boldy. Almatylyq kólik jáne kommýnıkasııa ǵylymı-zertteý ınstıtýtynyń mamandary ákimder bergen shuǵyl tapsyrmany shala-sharpy oryndaǵandarynyń kesiri turǵyndarǵa tıdi», dep jaz­dyq. Jazylǵan jaıǵa oralsaq, ob­lystyq ákimdik oblys ortaly­ǵyndaǵy №1 avtobýs parki 1 mlrd. 179 mıllıon teńgege satyl­dy, ıaǵnı jekeshelendirildi dep ha­barlaǵan edi. Endi avtobýs parki memlekettiń menshigine keri qaı­ta­rylady. Qazir qalalyqtar av­to­parktiń qaıta oralatynyna, burynǵy baǵyttardyń qalpyna keletinine qýanyshty. Parktiń jańa qojaıynyna – «Qazaqstan qurylys kompanııasy» JShS-ǵa negizgi talap – qurylǵanyna 50 jyldan asa ýaqyt bolǵan baıyrǵy kásiporynnyń basty baǵytyn saq­tap qalý tapsyrylǵan-dy. Ja­ńa avtobýstar satyp alý kerek boldy. Eki arada qarapaıym halyq zııan shekti. Alaıda, avtoparkti satyp alǵan qojaıyn qıyn jaǵdaıǵa tap boldy, dedi oblys ákimi Bolat Baqaýov jýrnalıstermen bolǵan brıfıng barysynda. Sóıtsek, oblys áki­miniń aıtýynsha, álgi qojaıyn bank­terden nesıe ala almapty. Ke­li­simshart osylaı buzylǵan kórinedi. – О́zgerister jolaýshylardy ábigerge túsirdi. Jergilikti tur­ǵyndar qolaısyzdyq úshin qala ákimdigine shaǵymdana bastady. Osy sebepti búginde qala ákimdigine parkti memlekettiń menshigine qaı­tarý týraly ótinishter túsýde. Kelisimshart buzylǵan soń, parkke jańa basshy taǵaıyndalyp, kásiporyn memlekettik mekeme retinde jumysyn bastaıdy, – deıdi Bolat Baqaýov. Farıda BYQAI, «Egemen Qazaqstan» PAVLODAR