Parlament Májilisindegi Qazaqstan halqy Assambleıasy depýtattyq tobynyń úndeýi
Qazaqstan halqy Assambleıasynyń XXIV sessııasy tarıhı mańyzy bar qujat bolyp tabylatyn «Máńgilik El» Patrıottyq aktisin qabyldady. Bul qujat kópetnosty jáne kópkonfessııaly Qazaqstan qoǵamy uıysýynyń ıdeologııalyq negizin qalaıdy.
Qaı zamanda da barlyq elder men halyqtar óziniń aıaýly armanyna qol jetkizýge umtylyp kelgen. Osy umtylysta ulttyq sana-sezimniń júıelengen jınaqtamasy bolyp tabylatyn ulttyq ıdeıa túpbeıne retinde anyqtalatyn. Bizdiń Otanymyz – Qazaqstan Respýblıkasynyń tabysty memleketke aınalýynyń bir syry halyqtyń tarıhı mıssııasy men ómir súrýiniń máni jaıyndaǵy máńgilik ári kókeıkesti suraqtarǵa jaýap qaıtara alatyn ıdeıany jańylyssyz taba bilgendiginde. Elbasymyz – búkil álem tanyǵan saıasatker Nursultan Nazarbaev basqaratyn, ortaq ıdeıamen qýattanǵan, ortaq maqsatqa birikken halyqtyń jappaı jáne shynaıy qoldaýynyń arqasynda biz Táýelsizdik tarıhynyń shırek ǵasyry ishinde asa aýqymdy tabystarǵa qol jetkizdik.
Qazaqstan Respýblıkasynyń Prezıdenti N.Á.Nazarbaevtyń Qazaqstan halqyna «Qazaqstan joly – 2050: bir maqsat, bir múdde, bir bolashaq» atty Joldaýynda «Máńgilik El» jalpyulttyq patrıottyq ıdeıasy alǵa tartylǵan bolatyn. Bul ıdeıany búkil qoǵam qazaqstandyq birtektilik pen birlikti, qoǵamdyq kelisimdi qalyptastyratyn qundylyqtar júıesi retinde qabyl aldy. «Máńgilik El» ıdeıasyn jalpyulttyq kelisimniń biregeı modeli retinde usyna otyryp, onyń avtory jáne arhıtektory – Elbasy Nursultan Nazarbaev bolashaǵy birtutas ultty qalyptastyrýdyń ózekti baǵyttaryn belgilep berdi. «Biz «Máńgilik El» jalpyulttyq ıdeıasyna ıe boldyq. «El» sózinde úlken biriktirýshi kúsh bar, óıtkeni, barlyq ýaqyttarda da týǵan jer qazaqstandyqtar úshin eń jaqyn jáne ózine tartýshy qundylyq bolǵan jáne bolyp qala beredi. «Máńgilik El» ıdeıasynda bolashaqqa degen jalpyhalyqtyq senim aınadaǵydaı kórinis tapqan. Jasampaz qazaqstandyq patrıotızmniń osynaý negizin biz ózimizdiń uly isterimizben qalyptastyrdyq. Ony nyǵaıtyp jáne kóbeıtip qana qoımaı, sonymen birge, urpaqtan urpaqqa, dáýirden dáýirge ulastyryp otyrý kerek. «Máńgilik El» Patrıottyq aktisiniń tarıhı jáne rýhanı kúshi de osydan tanylýy tıis» – Memleket basshysynyń «Ult Jospary – qazaqstandyq armanǵa bastaıtyn jol» atty maqalasynda osylaı aıtylǵan.
2016 jylǵy 1 qańtarda «5 ınstıtýttyq reformany júzege asyrýdyń 100 naqty qadamy» atalǵan Ult Josparyn oryndaýdyń is júzindegi kezeńi bastalǵany, onyń 85-qadamy retinde Prezıdent «Máńgilik El» Patrıottyq aktisin jasaýdy tapsyrǵany belgili. Memleket basshysy osynaý asa mańyzdy jumysty Prezıdent Ákimshiligine, Úkimetke jáne Qazaqstan halqy Assambleıasyna júktedi. Eki jyldyń ón boıynda búkil Qazaqstan halqyn biriktirip, jumyldyra túsetin jalpyulttyq ıdeıany tujyrymdaýǵa tıisti ortaq qujatty qalyptastyrý jóninde qajymaı-talmaı jumys júrgizildi. Bul ıdeıa barlyq deńgeıde talqylandy, qujattyń jobasy Qazaqstan patrıottarynyń forýmynda qaralyp, qoldaý tapty. Ol qazirdiń ózinde mádenı jáne ishki saıasat salasyndaǵy birqatar strategııalyq qujattardy taldap-jasaý kezinde negizge alyndy, olardyń arasynda Qazaqstan Respýblıkasynyń «Qazaqstan halqy Assambleıasy týraly» Zańy, Qazaqstan halqy Assambleıasy damýynyń (2025 jylǵa deıin) tujyrymdamasy, Qazaqstandyq birtektilik pen birlikti nyǵaıtý men damytýdyń tujyrymdamasy, Qazaqstan Respýblıkasyndaǵy mádenıet saıasatynyń tujyrymdamasy bar.
Búginde biz barynsha qanaǵat sezimimen myna jaıdy aıta alamyz: Prezıdent tapsyrmasy oryndaldy.
El Prezıdentiniń «Halyq ómiri onyń kelesi urpaǵymen jalǵasyp otyrady. Sondyqtan Halyqtyń Máńgiligi týraly armannan asqaq arman joq. Máńgilik El – bul erteńgi kúnge esik ashatyn, bolashaqqa senimdi arttyratyn ıdeıa, bul – keri qaıtpaıtyn jáne berik turaqtylyqtyń sımvoly» degen sózderimen bastalatyn Patrıottyq akt baıyrǵy qazaq jerinde ortaq taǵdyr men tarıhı jady arqyly baılanysqan, Uly Dala eliniń dańqty tarıhy men dástúrlerin jalǵastyryp, kóptegen urpaqtardyń Táýelsizdikti ańsaǵan armanyn iske asyryp jatqan, bolashaq urpaq aldyndaǵy qasıetti paryzyn, bizdiń ortaq úıimizdegi tatýlyq pen kelisimniń, birlik pen tutastyqtyń mán-mańyzyn paıymdaıtyn el azamattarynyń kókireginde aıalaǵan oılaryn bildiredi.
«Elbasy, Qazaqstan Respýblıkasynyń Tuńǵysh Prezıdenti Nursultan Nazarbaevtyń kóshbasshylyǵymen jańa Qazaqstannyń tarıhyn jazýdyń bıik mártebesi men jaýapkershiligi bizdiń urpaqtyń úlesine tıdi.
Elbasynyń mańyna toptasý arqyly biz uly jetistikterge toly joldan óttik jáne búginde ózimizdi Táýelsiz Qazaqstannyń – qýatty ári tabysty memlekettiń azamatymyz dep maqtanyshpen aıtamyz» – Patrıottyq aktiniń osynaý sózderi bizdiń barlyǵymyzǵa Bolashaǵy Birtutas El – Máńgilik Eldi qurý úshin zor jaýapkershilik júkteıdi.
Patrıottyq akt barsha qazaqstandyqtardy Máńgilik Eldiń myzǵymas Jeti tuǵyryn nyǵaıtýǵa, saqtaýǵa jáne urpaqtan urpaqqa amanat etýge shaqyrady, olar: Táýelsizdik jáne Astana, Jalpyulttyq birlik, beıbitshilik pen kelisim, Zaıyrly memleket jáne Joǵary rýhanııat, Innovasııa negizindegi turaqty ekonomıkalyq ósim, Jalpyǵa Ortaq Eńbek Qoǵamy, Tarıhtyń, Mádenıet pen Tildiń ortaqtyǵy, Ulttyq qaýipsizdik jáne Qazaqstannyń jalpyálemdik jáne óńirlik problemalardy sheshýge jahandyq turǵydan qatysýy.
Patrıottyq aktiniń qabyldanýy Qazaqstan qoǵamynyń tutastanýyna, bizdiń birligimizdiń nyǵaıýyna septesýge tıisti ekendigine talas joq. Bul qujat jalpyulttyq birtektilik ıdeıasyn naqtylaýdy jáne ony alǵa jyljytýdyń tetikterin taldap-jasaýdy kózdeıdi. «Birtektilik pen birlik jónindegi barsha jumysty biz Qazaqstan halqy Assambleıasynyń tóńiregine oraılastyryp quramyz. Bul túıindi qaǵıdat», dep atap aıtqan edi Prezıdent Nursultan Nazarbaev. Bul turǵydan qaraǵanda, bizdiń bárimizdiń aldymyzda aýqymdy jumys tur. Sonyń ishinde Parlament Májilisindegi barlyq partııalyq fraksııalardyń basyn qosyp, bir shańyraqtyń astynda ómir súrip jatqan barsha etnostardyń teń quqyqtylyǵynyń, birliginiń jáne kelisiminiń biregeı jolyn tańdaǵan qazaqstandyqtardyń san urpaǵynyń ıgiligi úshin partııaaralyq únqatysýdyń ózindik bir alańqaıyna aınalǵan Qazaqstan halqy Assambleıasynyń depýtattyq tobynyń atqarar jumysy da jetkilikti. Depýtattyq top Patrıottyq aktini nasıhattaýǵa barynsha septesetin bolady.
Jahandyq turaqsyzdyqtyń qazirgideı kúrdeli kezeńinde biz barlyq otandastarymyzdy el Prezıdenti – Elbasy Nursultan Nazarbaevtyń tóńiregine burynǵydan da tyǵyzyraq toptasýǵa, Otanymyzdyń Kók baıraǵyn asqaqtata kóterýge, qazaqstandyq armanǵa qol jetkizýge, elimizdiń – Qazaqstan Respýblıkasynyń odan ári órkendeýine jańa múmkindikter ashatyn «Máńgilik El» Patrıottyq aktisin júzege asyrýǵa barynsha belsene qatysýǵa shaqyramyz.
Úndeý Parlament Májilisindegi Qazaqstan halqy Assambleıasy depýtattyq tobynyń otyrysynda qabyldandy
2016 jylǵy 27 sáýir
