El maqtanyshy kimder eken?

Keshe Astanadaǵy Ulttyq akademııalyq kitap­­hana­da el Táýelsizdiginiń 25 jyldyǵyna arnalǵan «El maqtanyshtary» atty fotokórmeniń ashylý saltanaty ótti. Atalmysh rýhanı ordaǵa jınal­ǵan qaýym men kórme qonaqtary táýelsiz elimizdiń damýyna eren eńbek sińirgen tanymal tulǵalardyń fotobeınelerin tamashalaý baqytyna ıe boldy. Bul fotokórmeni Mádenıet jáne sport mı­nıstr­liginiń, Astana, Almaty qalalary, Atyraý jáne Ońtústik Qazaqstan oblystary ákimdikteriniń qoldaýymen, Ulttyq akademııalyq kitaphana men «FOTOО́NER» qoǵamdyq birlestigi birigip uıymdastyryp otyr. Kórmede Halyq qaharmany, Qazaqstannyń Eńbek Eri ataqtaryna ıe bolǵan tulǵalardyń, Olımpıada chempıondary, mádenıet pen eko­nomıka sala­laryndaǵy Memlekettik syılyq laýreattary jáne óner maıtalmandarymen qosa, zııaly qaýym ókilderinen quralǵan bir­qatar azamattardyń sýretteri qoıylǵan. Máse­len, Halyq qaharmandary Toqtar Áýbákirov, Talǵat Musabaev, Aıdyn Aıymbetov, Baqytjan Ertaev, Muhtar Altynbaev syndy aǵalarymyz da bar. Adam – kúrdeli týyndy. Onǵa jýyq kánigi fotograftar men fototilshilerdiń qas-qaǵym sátti qyraǵy sheberlikpen shynaıy ári esh boıamasyz tabıǵı qalypta túsirip alǵan sýret­teri kórme qonaqtarynyń kóńilinen shyqty deýge tolyq negiz bar. Atap aıtsaq, Asylhan Ábdiraıymov, Ońǵarbek Alqarov, Muhtar Holdorbekov, Turar Qazanǵapov, t.b. Onyń ishinde jas bolsa da ózindik qoltańbasymen elge tanylyp júrgen bizdiń áriptesimiz Erlan Omarovtyń da shoqtyǵy bıik fotosýretteri qoıylǵan eken. Mundaǵy bir erekshelik, bul fotosýretter buryn-sońdy jarııalanbaǵan jáne kórmege tuńǵysh ret qoıylyp otyr. Jobanyń túpki maqsaty – bolashaq urpaqqa arnap elimiz Táýelsizdik alǵannan bergi 25 jyl ishinde bolǵan memlekettik, qoǵamdyq jáne rýhanı mańyzy bar oqıǵalardyń fotoshejiresin jasaý eken. Izgi nıetke aq jol tileımiz. Raýshan TÁÝIRHANQYZY, «Egemen Qazaqstan» Sýretterdi túsirgen Erlan OMAROV