Jergilikti polısııa qyzmeti

Jetistikter men qıynshylyqtar Qaraǵandy qalasyndaǵy B.Beısenov atyndaǵy zań akademııasynda «Jergilikti polısııa qyzmeti: «100 naqty qadam» Ult Jospary aıasynda qalyptasýy men qyzmetiniń alǵashqy nátıjeleri» atty dóńgelek ústel  otyrysy ótti. Jıynǵa Parlament Májilisiniń depýtattary, Ishki ister mınıstrliginiń basshylyǵy, Qaraǵandy oblysynyń ákimi, «Nur Otan» partııasynyń Quqyqtyq keńes ókilderi qatysty. Jergilikti polısııa qyzmeti syndy jańa qurylymnyń aıaq alysyn talqylaǵan jıyndy Májilistegi zań shyǵarý jáne sot-quqyqtyq reforma jónindegi komıtettiń tór­aǵasy, «Nur Otan» partııasy janyndaǵy Quqyqtyq keńestiń tóraǵasy Nurlan Áb­dirov ashyp, júrgizip otyrdy. Májilismen 2016 jyldyń 1 qań­tarynda qabyldanǵan «Qa­zaqstan Respýblıkasynyń keıbir zańnamalyq aktilerine jergilikti polısııa qyzmetiniń jumysy máseleleri boıynsha ózgerister men tolyqtyrýlar engizý týraly» zańnyń bes ıns­tıtýttyq reformany júzege asyrý boıynsha «100 naqty qadam» – Ult Josparyn oryndaýǵa baǵyttalǵanyn jáne de osy zańǵa sáıkes, turǵyndar men jergilikti atqarýshy organdarǵa esep beretin jergilikti polısııa qyzmetiniń qurylǵanyn atap ótti. Qazirgi tańda quqyq qor­ǵaý salasyndaǵy jańa qu­ry­lymnyń aldyndaǵy min­detteri naqtylanǵan. Ol – qoǵamdyq tártipti nyǵaıtý jáne qylmystyń aldyn alý, sonymen qatar, turǵyndardyń ishki ister organdaryna degen senim deńgeıin kóterý jáne olardyń jumysyndaǵy ashyqtyqty qam­tamasyz etý. «Álbette, jergilikti polısııa qyzmeti qoǵamdyq jańa ınstıtýt bolǵandyqtan, ol jumys isteı bastaǵannan bergi ýaqytta birshama suraqtardyń týyndaǵany ras. Dál qazirgi kezeńde jańa qurylym jumy­synyń belgili bir nátıjelerine taldaý jasaýǵa bolady», – dedi N.Ábdirov. О́z kezeginde Ishki ister mınıstri Qalmuhanbet Qasymov qazirgi tańda jergilikti polısııa qyzmetin uıymdastyrý boıynsha qajetti degen barlyq zańnamalyq jáne praktıkalyq sharalardyń qabyldanǵanyn tilge tıek etti. Ásirese, mınıstr jańa qurylymnyń jer­gilikti ákimdiktermen jáne ishki ister organdarynyń bas­­­qa da qyzmetterimen qa­rym-qatynasyn retteıtin mehanızmniń ázirlenip, iske asyrylyp jatqanyna egjeı-tegjeıli toqtaldy. Qaraǵandy oblysynyń ákimi Nurmuhambet Ábdibekov kenshiler astanasyna mańyzdy sharýamen arnaıy kelgen már­tebeli meımandarǵa alǵys sezimin jetkizgen soń, jańa qurylymnyń aımaqtaǵy tynys-tirligi týraly óńir basshysynyń birinshi orynbasary Asylbek Dúısebaev áńgimelep berdi. «Búgingi kúni Qaraǵandy oblysynda áleýmettik-saıası jaǵ­daı turaqty saqtalýda. Bul jerde quqyq qorǵaý organdary qyzmetkerleriniń, onyń ishinde, jergilikti polısııa qyzmetiniń eńbegi bar ekendigi sózsiz», – degen ol atqarýshy bılik tarapynan ishki ister organdaryna kórsetilip jatqan qamqorlyq týrasyn sóz etti. Qazirgi tańda Qaraǵandy oblysynda jergilikti polısııa qyzmetiniń quramynda 2702 qyzmetker bar. 2016 jyly ishki ister organdaryn ustap turýǵa oblystyq bıýdjetten 10 mlrd. 203 mln. teńgeden astam qarjy bólinse, jergilikti polısııa qyzmetine osy somanyń 1 mlrd. 738 mln. teńgesi qarastyrylǵan. Qarjylandyrý kezeń-kezeńimen júrgizilmek. Mysaly, osy aptada jergilikti polısııa qyzmetine avtokólikter alý úshin bıýdjet­ten 100 mln. teńge bólý jos­par­lanǵan. «О́ńirde jergilikti atqarýshy organdar men ishki ister organdary arasynda tyǵyz qarym-qatynas ornatylǵan. Qaraǵandy oblysyndaǵy jergilikti polısııa qyzmetiniń jumysy bo­ıynsha qalalar men aýdandar ákimderiniń qatysýymen turaqty túrde má­ji­lister ótip turady», – dedi A.Dúısebaev. Dóńgelek ústelde sóz alǵan Ishki ister mınıstrligi Ákimshilik polısııasy komıtetiniń tóraǵasy Igor Lepeha reforma barysynda birqatar máselelerdiń týyndaǵanyna toqtaldy. Máse­len, búgingi kúnde polıseıler otbasynyń shyrqyn buzatyn janjalqoılar isin kóbine jaza­laýǵa deıin jetkize almaı otyr eken. Buryn mundaı berekesiz jandar birneshe kúnge ákimshilik qamaýǵa alynatyn. Al qazir densaýlyqqa jeńil zaqym keltirgenderge 200 AEK mólsherinde aıyppul salynady. «Iаǵnı, jaǵdaı bylaısha qalyptasady: kúıeýi áıelin sabaıdy, áıel polısııa shaqyrady, biz bul materıaldy sotqa jiberemiz, sodan keıin baryp álgi erkekke 400 myń teńge kóleminde aıyppul salynady. Al muny estigende áıel birden kúıeýimen tatýlasady da, budan keıin polısııaǵa habarlaǵandy múldem qoıady. Sóıtip, biz prob­lemany otbasyna qaıta qýyp tyǵyp, bul jaǵdaı kisi ólimine deıin aparatyn aýyr zardaptarmen aıaqtalǵansha tosyp otyramyz»,  – dedi I.Lepeha. Sondaı-aq, dóńgelek ústel barysynda elimizdiń basqa óńirlerinen kelgen ishki ister organdarynyń ókilderi de óz oblystaryndaǵy jaǵdaı týraly baıandady. Atap aıtqanda, Aqmola oblysynan J.Omarov, Qaraǵandy oblysynan J.Ja­qaev, Pavlodar oblysynan Iý.Kolesnıkov, Astanadan B.Ma­lybaev jáne Almaty qalasynan J.Báıkenov jumysyn endi bastaǵan jergilikti polısııa qyzmetindegi máseleler týrasynda oı-pikirlerimen bólisti. Dóńgelek ústel otyrysyn qorytyndylaǵan Májilis depýtaty N.Ábdirov búgingi kúnde jergilikti polısııa qyzmetiniń aldynda turǵan eń basty mindet – qylmystyń aldyn alý ekendigine basa nazar aýdardy. «Túrmege toǵyta berý – tyǵyryqtan alyp shyǵatyn jol emes. Bizdiń baǵyt – qylmysty boldyrmaýdyń jan-jaqty amaldaryn qarastyrý», – dep túıindedi sózin N.Ábdirov. Kóshpeli jıyn aıasynda Májilis depýtattary Qaraǵandy jáne Temirtaý qalalaryndaǵy jergilikti polısııa qyzmetiniń nysandarymen tanysty. Polı­sııa qyzmetkerlerimen jáne de tur­ǵyndarmen áńgime-dúken quryp, usynys-pikirlerge qu­laq asyp, kóptegen jaıttarǵa qanyqty. Qaırat ÁBILDINOV, «Egemen Qazaqstan» QARAǴANDY