Patrıottyq akt – úles qosar úlken bastama

Qazaqstan halqy As­sam­bleıasynyń ár sessııasyn otan­dastarymyzdyń qýanyshpen kórip, tamashalaıdy, materıaldaryn zerdelep oqyp tanysady. О́ıtkeni, munyń barlyǵy mysqaldaı jasan­dylyǵy joq, ómir­diń ózindeı shynaıy bo­lýynan dep bilemin. Bizdiń eldegi ult pen ulystar ta­týlyǵynyń, birliginiń ózge jerde balamasy joqtaı kórinedi maǵan. Shyndyǵynda da solaı shyǵar, bálkim. Elbasy aıtqandaı, Máńgilik El uǵymy ǵasyrlar tereńinen tar­tylǵandaı, onyń aıasyna kóp maǵyna syıady. Máńgilik Eldiń basty maǵynasy – Táýelsizdik! Terektiń tamyry tereńge ketpese daýylǵa shydamaıdy. Táýelsizdik te sondaı, eldiń dás­túrin, tarıhyn, tilin, dinin, dilin saqtamasaq, Táýelsizdiktiń mazmuny solǵyn tartady. Bizdiń halqymyzdyń jady esh nárseni umyttyrǵan joq. Atalarymyz bizge jetkizgen muralardy alǵa aparý, sonymen urpaq sabaqtastyǵyn úzbeý qasıetti paryzymyz bolýy tıis. Qasıetti shańyraq, otbasy, qonaqjaılylyq, eńbeksúıgishtik pen birlik atadan qalǵan basty muralar bolyp tabylady. Bul búginde bizdiń qoǵamnyń sıpatyna aınalyp ketken. Birligimizge shúkirshilik ete­miz. Ol – Qazaqstan halqy As­sambleıasynyń HHIV sessııasy tujyrymdaǵan Patrıottyq aktiniń negizi bolyp tabylady dep oılaımyn. Jáne osy birliktiń taldyń shybyǵyn kúshtep ıgendeı, joǵarydan telip júrgizip otyrǵan saıasat emes, kúndelikti tirligimizdiń shynaıy kórinisi ekenine kúnde kózimiz jetedi. Adamdardyń túsine, tiline qaramaı, bir-birine degen meıirimdiligin men kún saıyn ómirde kezdestirip otyramyn. О́zimizdiń qurbylarymyz da, kórshi-kólemimiz de san ulttyń ókilderi. О́mirdiń qýanyshy men qıyndyqtaryn barlyǵymyz da bir qalada, bir kóshede birge kórip kelemiz. Qazir bir qazaq­stan­­dyqtyń qýa­nyshy – bar qazaqstandyqtyń qýanyshyna, ortaq maq­tanyshymyzǵa aı­nalǵan. Mysaly, Gennadıı Go­lov­kınniń ame­rıkalyq Domınık Ýeıdpen jek­pe-jegi bolatyn kúni qostanaılyqtar jeksenbi ekenine qaramaı, ádet­tegiden erte turdy. Qarsylasyn bes mınýttyń ishinde tehnıkalyq nokaýtqa jibergen Genanyń kezekti jeńisi barlyq qazaqstandyqtardyń rııasyz qýa­­nyshyna aınalǵany aqıqat shyndyq. Qazir júzinen ımany tógilip, boıynan qaısarlyq pen eńbeksúıgishtik, adamgershilik, asa daryndylyq atoılap turatyn Gennadıı Golovkındi, sondaı-aq, eki dúrkin olımpıada chempıony, ziltemirshi Ilıa Ilındi úlkender jaǵy óz ulyndaı aınalyp-tolǵanyp otyrady, olar jastardyń kýmırine aınalyp úlgerdi. Birlik pen tatýlyqtyń mun­daı jarqyn mysaldaryn hal­qy­myzdyń kúndelikti ómirinen kóptep kezdestirýge bolady. Son­dyq­tan elimizdiń, halqymyzdyń jalpyulttyq birligi Máńgilik Eldiń jeti tuǵyrynan oıyp oryn alýy zańdylyq emes pe? Al Máńgilik Eldiń myzǵymas bir tuǵyry – zaıyrly memleket jáne joǵary rýhanııat. Táýelsizdigimizdi alǵan kúnnen bastap Qazaqstan ózin zaıyrly memleket dep jarııalady. Adamzat qoǵamynda dinniń alar orny erekshe. Ol – rýhanııat kóziniń biri, mádenıettiń de bir bulaǵy dinnen bas­taý alady, ımandylyqtyń, adamgershiliktiń de bastaýy sonda jatyr. Biraq aınalamyzdan kórip otyrǵanymyzdaı, din túrli kıkiljińniń, ulttar arasyndaǵy arazdyq pen jekkórýshiliktiń, memleketter arasyndaǵy teketirestiń sebebine aınalmaýy tıis. Dinı toleranttylyqtyń, ár­kimniń dinı senimine ózara qurmetpen qaraýdyń da bizdiń elimizde jaqsy qalyptasqany qýantady. Mine, hrıstıan dinin ustaýshylardyń Pasha merekesi kelip qaldy. Ony toılaǵan hrıstıan dinindegi qostanaılyqtardy barlyǵy da quttyqtap, merekeni birge toılaıdy. Ujymdarda hrıstıan dinin ustanatyn áriptesterimiz pasha men boıalǵan jumyrtqa qoıyp, sháı dastarqanyn jaıýdy umytpaıdy. Barlyq ulttyń ókili merekeni osylaı atap ótedi. Qurban aıtta da musylmandardy barlyǵy quttyqtap jatady. Dastarqanǵa keledi. Qandaı jarasymdylyq! Tek kóz tımesin dep tileımiz. Jeti tuǵyrdyń ishinde In­no­va­sııa negizindegi turaqty ekono­mıkalyq ósim, Jalpyǵa Ortaq Eńbek Qoǵamy, tarıhtyń, mádenıet pen tildiń ortaqtyǵy, Ulttyq qaýipsizdik jáne Qazaqstannyń jalpy álemdik jáne óńirlik problemalardy sheshýge jahandyq turǵydan qatysýy sekildi qadaý-qadaý, ábden ıi qanǵan tujyrymdar engen. Munyń barlyǵy da bir jaǵynan búgingi ómirimiz bolsa, ekinshiden, Táýelsizdik tuǵy­ryn bekite túsý úshin alda qolǵa alatyn kóp jumystyń jobasyndaı da kórinedi maǵan. Mysaly, búgingi jastardy eńbekke baýlý tárbıesin tereńdete túsý kerektigi aıtylyp júr. Bul – óte mańyzdy másele. Elbasy muny osydan birneshe jyl buryn óziniń maqalasynda tereńdete aıtqan bolatyn. Qazir óte kóp áńgime bolyp jatqan úsh tildi meńgerý de eńbekke táýeldi. Eńbek etse barlyǵyna da qol jetkizýge bolatynyn jastarǵa qur sózben emes, ispen kórsetken lázim. Eńbekqor adam óz Otanynyń patrıoty da bolady. Al patrıottar elinde ulttyq qaýipsizdik qamtamasyz etiletini aıqyn. Qazaqstan halqy Assam­bleıa­synyń HHIV kezekti sessııasy osyndaı maǵynaly jumystarymen qýantty, tarıhı mıssııasyn oryndady. Márzııa ESQAZINA, oblystyq temirjol aýrýhanasy bas dárigeriniń orynbasary QOSTANAI