Qostanaıda belgili kásipker qaıtys boldy

QOSTANAI. 28 sáýir. Qostanaıda belgili kásipker, «DEP» sút zaýytynyń dırektory Evgenıı Petrovıch Drýjının 53 jasynda qaıtys boldy. Bul týraly egemen.kz tilshisi habarlady. Evgenıı Drýjının Qostanaı óńirinde tamaq ónerkásibiniń, jalpy aýyl sharýashylyǵy ónimin óńdeý ónirkásibiniń damýyna qomaqty úles qosqan kásipker bolatyn. Ol «DEP» sút zaýytynyń negizin qalaǵannan bastap, ony ómiriniń sońyna deıin basqardy. Atalǵan sút zaýytynyń sapaly ónimin tek Qostanaı óńiri ǵana emes, Qazaqstannyń kóptegen oblystary paıdalanady, onyń ókildikteri birneshe oblystarda bar. Zaýyt ónimin Reseıge de eksporttaıdy. Kóptegen kórmelerge qatysyp, júldeli oralyp júrdi. Evgenıı Petrovıch «Dastarhanda qospasy joq tek tabıǵı ónim, azyq bolýy tıis» degen ustanymda bolatyn. Sheber uıymdastyrýshy sońǵy jyldary Qostanaı qalasynyń irgesindegi Zatobol kentinen kópke saqtalatyn nan óndiretin zamanaýı zaýyt qurylysyn da bastap edi. Amal ne, isti aıaqtaýǵa onyń ómiri jetpedi. Kásipker «Men asa túsinbesem de, elimizdiń qazaq tildi basylymdaryna qurmetpen qaraımyn» deıtin. «Egemen Qazaqstan» gazetine de osy sózdi arnap edi. Marqum óziniń týǵan jeri Rýdnyı qalasynda jerlenedi. Názıra Járimbetova. Derek, foto: egemen.kz.