Elimizde eńbek qorǵalady

Taıaýda Astanadaǵy «Kór­me» ortalyǵynda Den­saý­lyq saqtaý jáne áleýmettik damý mınıstrliginiń qoldaýymen Dúnıejúzilik eńbekti qorǵaý kúnine oraı VI Qazaqstandyq halyqaralyq konferensııasy ótip, Eńbekti qorǵaý jáne óndiris qaýipsizdigi jónindegi «KIOSH-2016» kórmesi ashyldy. Konferensııa barysynda Densaýlyq saqtaý jáne áleýmettik damý mınıstri Tamara Dúısenova eldegi jumys oryndarynda qaýip­siz ári densaýlyqqa zııany joq eńbek jaǵdaılaryn jasaý­ǵa aıryqsha mán beri­lip otyrǵanyn atap ótti. «Resmı derekterge súıen­sek, 2015 jyly tekserýden ótken 1,6 mln. óndiris jumys­shylarynyń 367 myńy, ıaǵnı ár­bir tórtinshi azamat qaýipti ári zııandy eńbek jaǵdaı­larynda jumys istegen. О́tken jyldyń nátıjeleri boıynsha 675 myń adam zııand­y eńbek jaǵdaılarynda jumys istegeni úshin qosymsha demalys, ústemaqylar, qysqartylǵan jumys kúni jáne t.b. túrindegi ótemaqy aldy. Atalǵan maqsatqa jumys berýshiler 103 mlrd. teńge kóleminde qarjy bólgen. Bul 2014 jylmen salystyrǵanda 7 paıyzǵa ulǵaıǵan», – dedi Tamara Dúısenova. Sondaı-aq, mınıstr ótken jyly elimizdiń óndiris oryndarynda eńbekti qorǵaý men onyń qaýipsizdigin basqarýdyń zamanaýı júıesin qurýǵa baǵyttalǵan jańa Eńbek kodeksi ázirlenip, 2016 jylǵy 1 qańtardan bastap kúshine engenin eske saldy. Ol sonymen qatar, Qazaq­standa EYDU jáne Ha­lyq­aralyq eńbek uıymynyń qaýipsizdik standarttaryna saı kásibı qaýip-qaterlerdi bas­qarý tetikteri kezeń-ke­zeńimen engiziletinin atap aıt­ty. Mınıstr 2030 jylǵa qaraı óndiristik jaraqattaný men kásibı syrqattaný kórset­kishteri aıtarlyqtaı azaıyp, álemniń damyǵan elderindegi ozyq deńgeıge jetetin úmitte ekendigin de jasyrmady.